2025 жылғы 23 тамызда Шымкент қаласында педагогтер мен сала басшыларының басын қосқан дәстүрлі Тамыз конференциясы өтті. «Білім келешегі: адал азамат, кәсіби маман» тақырыбымен өткен биылғы конференция – еліміздегі білім беру саясатының өзекті бағыттары мен болашағына жаңа серпін берген маңызды диалог алаңына айналды.
Жиынға ҚР Оқу-ағарту министрі Ғани Бейсембаев, Шымкент қаласының әкімі Ғабит Сыздықбеков, министрлік пен қала әкімдігі құрылымдарының басшылары, зиялы қауым өкілдері, құқық қорғау органдарының жетекшілері, аудан әкімдері, жоғары оқу орындарының оқытушылары, мектеп директорлары мен тәжірибелі ұстаздар қатысты. Ауқымды іс-шара білім беру саласындағы жаңа міндеттерді талқылап қана қоймай, үздік тәжірибелерді ортаға салуға мүмкіндік берді.
Конференция аясында ұйымдастырылған көрме – биылғы жиынның ерекше тұстарының бірі болды. Шымкенттегі жаңа үлгідегі «Келешек» мектептерінің оқушылары өздерінің ғылыми жобаларын, шығармашылық жетістіктерін және инновациялық өнімдерін көпшілік назарына ұсынды. STEM және робототехника бағытындағы жобалар, 3D модельдер, қолөнер мен цифрлық өнімдер көрмеге келушілер тарапынан ерекше қызығушылық тудырды.
Жас өнертапқыштардың жұмыстары – білім беру жүйесінің дәстүр мен технологияны тиімді үйлестіре отырып, келешекке қызмет етіп жатқанын айғақтады.
Жиын барысында сөз сөйлеген ҚР Оқу-ағарту министрі Ғани Бейсембаев ұстаздар қауымын жаңа оқу жылының басталуымен құттықтап, Мемлекет басшысының білім беру саласына бағыттаған стратегиялық қолдауын ерекше атап өтті. Министр өз баяндамасында:
- мұғалімдердің кәсіби дамуын жетілдіру,
- білім беру мазмұнын жаңғырту,
- цифрлық құралдарды тиімді енгізу,
- оқушы тұлғасын дамытуға бағытталған ұлттық тәрбие жүйесін нығайту
сияқты маңызды бағыттарға басымдық берілетінін нақты атап өтті.
Сондай-ақ, педагогтердің әлеуметтік жағдайын жақсарту, білім сапасын арттыруға арналған қолдау шаралары мен нормативтік жаңашылдықтар жөнінде нақты түсіндірме берілді. Министрдің сөзінен кейін ұстаздар жаңа оқу жылына сеніммен қадам басуға дайын екендерін білдірді.
Өз кезегінде Шымкент қаласының әкімі Ғабит Сыздықбеков білім беру саласындағы өңірлік жетістіктер мен алдағы жоспарлар жайлы баяндады. Соңғы екі жылда Шымкент қаласында 39 жаңа мектеп пайдалануға берілсе, Ұлттық жоба аясында тағы 12 білім ұясы бой көтерді. Ал 2025–2026 жылдары тағы 37 жаңа мектептің құрылысы жоспарланған.
Әкімнің айтуынша, бұл қадамдар қаланың қарқынды демографиялық өсіміне жауап ретінде білім инфрақұрылымын кеңейтуге бағытталған. Сонымен қатар:
- 2020 жылдан бері аз қамтылған отбасылардың балалары мектеп формасымен толық қамтылып келеді;
- әлеуметтік жағдайы төмен отбасылар үшін балабақшаларда тегін орындар қарастырылған;
- қалада білім алуға қолжетімділікті арттыру бағытында нақты жұмыстар жүргізілуде.
Шымкент қаласы білім басқармасының басшысы Гүлназ Сүлейменова 2025–2026 оқу жылына дайындық жұмыстары туралы баяндама жасап, нақты деректер келтірді. Оның айтуынша:
- Биыл 28 мыңға жуық бүлдіршін алғаш рет мектеп табалдырығын аттайды;
- Барлық мектептер жаңа оқу жылына қажетті оқулықтармен толық қамтылған;
- Мектептердегі оқу-тәрбие үдерісін жетілдіруге арналған әдістемелік қолдаулар мен оқыту курстары ұйымдастырылған;
- Жоғары оқу орындарында еңбек нарығына қажетті мамандықтарға бөлінетін мемлекеттік гранттар саны артқан. Соңғы екі жылда 285 студент тегін білім алу мүмкіндігіне ие болды.
Жиын соңында ұрпақ тәрбиесіне өлшеусіз үлес қосқан сала үздіктері марапатталды. Мұғалімдер, әдіскерлер, педагог-психологтар мен техникалық қызметкерлерге түрлі деңгейдегі марапаттар мен алғыс хаттар табысталды. Бұл — ұстаздар қауымының қоғам алдындағы рөлін жоғары бағалаудың жарқын көрінісі болды.
