Шымкент – еліміздің үшінші мегаполисі ғана емес, жас ұрпақтың жан-жақты дамуына ерекше көңіл бөлінетін ірі білім орталықтарының бірі. Балалардың бос уақытын тиімді ұйымдастыру, олардың шығармашылық, техникалық және зияткерлік қабілеттерін дамыту – қазіргі білім саясатының басым бағыттарының қатарында. Осы орайда 2025 жылғы 23 тамызда Қазақстан Республикасының Оқу-ағарту министрі Ғани Бейсембаев Шымқаладағы №2 оқушылар сарайына арнайы барып, атқарылып жатқан жұмыстармен жан-жақты танысты.
Министр ең алдымен оқушылар сарайында ұйымдастырылған үйірме жұмыстарының барысымен танысып, балалар мен жасөспірімдерге арналған қосымша білім беру бағдарламаларын көрді. Қазіргі таңда бұл орталықта түрлі бағыттағы ондаған үйірме жұмыс істейді. Олардың қатарында:
- робототехника мен бағдарламалау;
- музыка және аспаптық орындау;
- театр және сахналық өнер;
- хореография мен би;
- сәндік-қолданбалы өнер;
- көркем сурет;
- техника және авиамодельдеу;
- фото және бейнеөнер сынды бағыттар бар.
Балалар өз жұмыстарын, жобаларын, өнер туындыларын таныстырып, мини-көрмелер мен интерактивті шеберлік сағаттарын ұйымдастырды. Өз кезегінде министр балалардың қызығушылығына, өзіндік көзқарасына, шығармашылық батылдығына жоғары баға беріп, олардың болашағына сенім білдірді.
Сапар барысында Ғани Бейсембаев балалармен еркін форматта жүздесіп, олардың армандары, хоббиі және жетістіктері туралы сұхбаттасты. Министрді оқушылардың заманауи бағыттарға қызығушылығы, өз жобаларын жан-жақты таныстыруы, жаңашыл идеяларға ашықтығы ерекше қуантты.
Оқушылармен болған диалог барысында білім берудегі жаңашылдықтар, олимпиадалық дайындық, шығармашылыққа қолдау, халықаралық жобаларға қатысу мүмкіндіктері секілді өзекті тақырыптар қозғалды. Білім беру саласының басшысы балалардың талап-тілектерін тыңдап, «әр баланың дарыны – мемлекет үшін маңызды ресурс» екенін атап өтті.
Министрдің сапары барысында ерекше білім беру қажеттіліктері бар балалармен де арнайы кездесу ұйымдастырылды. Бұл – инклюзивті білім беру саясатының нақты іске асуын көрсететін маңызды бағыт. Ғани Бейсембаев мүмкіндігі шектеулі балалардың шығармашылық жобалары мен өнер туындыларын көріп, олардың әлеуетіне ерекше көңіл бөлді.
Оқушылар сарайы бұл бағытта жүйелі жұмыс атқарып келеді. Ерекше балалар үшін бейімделген үйірмелер, қолөнер, музыка және арт-терапия бағытындағы шеберлік сабақтары ұйымдастырылып отырады. Балалардың әлеуетін ашуға бағытталған бұл шаралар қоғамда инклюзивті орта қалыптастыруға айтарлықтай үлес қосуда.
Министр сапар соңында қосымша білім беру саласында қызмет етіп жүрген педагогтер мен үйірме жетекшілерімен жүздесіп, олардың еңбегіне алғыс білдірді. Оның айтуынша, балалардың қабілетін танып, оны дамытуға бағыт беру – үлкен кәсіби жауапкершілікті талап ететін жұмыс.
— Бүгінгі жас — ертеңгі инженер, әртіс, ұстаз, ғалым немесе қоғам қайраткері. Баланың бағыты мен қабілетін дер кезінде байқап, оған қолдау көрсету – сіздердің қолдарыңызда. Сондықтан қосымша білім беру педагогтерінің еңбегі әрдайым ерекше бағалануы тиіс, – деді министр.
Жаңа оқу жылында №2 оқушылар сарайы және басқа да орталықтар Шымқаланың жас өрендеріне шабыт сыйлап, әр баланың дарынын ұштауға бағытталған жұмыстарын жалғастыра бермек. Ал министрлік тарапынан қосымша білім беру саласына қолдау көрсету — алдағы басты басымдықтардың бірі болмақ.
