2025 жылғы 1 тамыздан бастап Шымкент қаласында Қазақстан Республикасы Үкіметінің 2008 жылғы 25 қаңтардағы №64 және 2025 жылғы 8 мамырдағы №320 қаулыларына сәйкес жыл сайын дәстүрлі түрде ұйымдастырылып келе жатқан «Мектепке жол» республикалық акциясы өз жұмысын бастайды. Бұл игі бастама жаңа оқу жылы қарсаңында ел болашағы – балалардың алаңсыз білім алуына жағдай жасау, олардың оқу үрдісіне толыққанды дайын болуын қамтамасыз ету мақсатында өткізіледі. Акцияның негізгі мақсаты – аз қамтылған, көп балалы, тұрмысы төмен отбасылардан шыққан, сондай-ақ жетім және ата-анасының қамқорлығынсыз қалған балаларға әлеуметтік көмек көрсету арқылы олардың мектепке баруына қолдау білдіру. Сонымен қатар, бұл шара балалардың білім алуға тең мүмкіндігін қамтамасыз етуге, әлеуметтік теңсіздіктің алдын алуға және мектеп жасындағы балалардың оқу үрдісінен тыс қалу қаупін болдырмауға бағытталған.
Акция аясында көмекке мұқтаж оқушыларға мектеп формасы, аяқ киім, кеңсе тауарлары, сөмке, оқу құралдары, жеке гигиеналық заттар мен басқа да оқу үшін қажетті жабдықтар тегін беріледі. Жоба аясында әрбір балаға тек материалдық емес, сонымен қатар рухани қолдау көрсетіліп, олардың жаңа оқу жылын сеніммен бастауына мүмкіндік жасалады. Аталған қайырымдылық шарасы тек білім басқармасы мен білім беру ұйымдарының ғана емес, сонымен қатар жергілікті атқарушы органдардың, үкіметтік емес ұйымдардың, демеушілердің, кәсіпкерлердің және белсенді азаматтардың атсалысуымен жүзеге асырылады.
Қатысу жолдары қарапайым әрі қолжетімді. Шымкент қаласының барлық төрт ауданында – Абай, Әл-Фараби, Еңбекші және Қаратау аудандарында арнайы штабтар құрылып, ата-аналар мен заңды өкілдерден өтініштер қабылданады. Сонымен бірге, уақыт үнемдеу мен цифрлық қолжетімділікті арттыру мақсатында электронды форматта өтініш беру мүмкіндігі де ұсынылады. Қосымша ақпарат пен нақты кеңес алу үшін Шымкент қаласы білім басқармасына немесе тұрғылықты жеріңіз бойынша аудандық білім бөлімдеріне хабарласуға болады.
Бұл акция – тек материалдық көмек берудің құралы ғана емес, ол – қоғамның біртұтастығы мен бауырмашылдығын көрсететін, әр баланың бақытты балалық шағына үлес қосатын үлкен рухани жоба. Балалардың көзіндегі қуаныш пен алғыс – бұл әрбір қамқор жүректің шынайы марапаты. Сондықтан осы бастамаға үлес қосып, қоғамдағы ізгіліктің артуына бірге атсалысайық. Кішкентай қамқорлық – үлкен үміттің бастауы!
