Келес ауданында мемлекеттік қызметшілер мерекесі аталып өтті. 23-ші маусым ҚР мемлекеттік қызметкерлер күні. Осыған орай, Келес ауданының мемлекеттік салада қызмет етіп жүрген бірқатар азаматтарға Тұңғыш Президент, Елбасы Нұрсұлтан Назарбаевтың, облыс және аудан әкімінің алғыс хаттары табысталды. Сонымен қатар, Мақтаарал ауданындағы төтенше жағдайда ерен қызметімен көзге түскен аудандық аурухананың басшысына, аудандық полиция бөлімінің бастығына Мақтаарал ауданы әкімінің алғыс хатын табыстады.
Аудан әкімі Ақментай Есбаев мемлекеттік қызметшілерді кәсіби мерекесімен құттықтап, мемлекеттік қызметшілердің бүгінгі рөлі, мойнындағы міндеттері үлкен жауапкершілікті қажет ететіндігін атап өтті. Бүгінгі таңда елімізге келген індеттің алдын алу, сақтану секілді жұмыстары барысында мемлекеттік қызметкерлердің орасан қызмет атқарып жатқанын тілге тиек етіп, әрбір өркениеттің өріне қадам бастаған мемлекеттің ең басты тірегі, оның идеясы мен саясатын алға апарушы мемлекеттік қызметкер екенін атап, мерекемен құттықтады.
