Қазақстан Республикасының Тәуелсіздігі күні қарсаңында Түркістан облысы Шардара ауданында ерекше және тағылымды шара өтті. Биыл үшемдерді дүниеге әкелген Ешмуратовтар және Оңайовтар отбасыларына жаңа пәтер кілттері салтанатты түрде табысталды. Бұл іс-шара көпбалалы отбасыларды қолдауға, әлеуметтік жағдайын жақсартуға және балалардың қауіпсіз әрі жайлы ортада өсуін қамтамасыз етуге бағытталған.
Бұған дейін аудан әкімі Арман Қарсыбаевтың қолдауымен демеушілер есебінен әр отбасына 3 миллион теңгеден қаржылай көмек көрсетілген болатын. Ал мереке қарсаңында аудан әкімінің бастамасымен Шардара қаласындағы Ж. Қолдасов көшесінде орналасқан, заман талабына сай салынған жаңа пәтерлердің кілттері салтанатты түрде табысталды.
Салтанатты жиында аудан әкімі Арман Қарсыбаев сөз сөйлеп, көпбалалы отбасыларды қолдау – тәуелсіз мемлекет саясатының маңызды бағыты екенін атап өтті. Ол жаңа пәтерлердің сапасы мен қолайлылығы тұрғындардың тұрмысын жақсартуға, балалардың қауіпсіздігін қамтамасыз етуге және отбасының береке-бірлігін нығайтуға бағытталғанын жеткізді. Сонымен қатар, ауданның әлеуметтік дамуына үлес қосқан әрбір азаматтың еңбегі еленіп, қоғамдағы жауапкершілік пен қайырымдылық дәстүрі арта түскені айтылды.
Аудандық мәслихат төрағасы Бұлтбай Мүтәлиев құттықтау сөз сөйлеп, үшемдердің аман-есен өсіп, ел игілігі жолында еңбек ететін азамат болып қалыптасуына тілектестік білдірді. Жиынға қатысқан ауыл ақсақалдары мен зиялы қауым өкілдері де жаңа шаңырақ иелеріне ақ баталарын беріп, бақыт, тыныштық пен береке тіледі.
Қуанышы қойнына сыймаған қос шаңырақ иелері аудан басшылығына және демеушілерге шынайы алғыстарын білдірді. Айта кетейік, жаңа баспаналар толықтай демеушілер қаражаты есебінен салынған, барлық қажетті тұрмыстық жағдайлармен жабдықталған, заманауи инженерлік желілер орнатылған.
Баспана тек тұрғындардың тұрмысын жақсартып қана қоймай, отбасының әлеуметтік тұрақтылығын нығайтады, балалардың білім алуына және тұлғалық дамуына қолайлы жағдай жасайды. Жаңа үйлерде тұрғындар ыңғайлы өмір сүру үшін қажетті тұрмыстық техникалар мен жиһаздармен қамтылған, ауыз су, электр және газ жүйелері толық енгізілген.
Бұл бастама қоғамдағы әлеуметтік жауапкершілікті арттыруға, жастар мен тұрғындарды белсенділікке ынталандыруға ықпал етеді. Тәуелсіз елдің әрбір сәбиі – жарқын болашақтың кепілі, ал мұндай шаралар елдің бірлігін, мейірімділігін және ынтымағын нығайтуға үлес қосады.
Сонымен қатар, аудан әкімдігі алдағы уақытта да көпбалалы және мұқтаж отбасыларға қолдау көрсету бағдарламаларын жалғастырып, әлеуметтік тұрғыдан осал топтарға арналған жаңа пәтерлерді салу жоспарланған. Бұл іс-шаралар өңірде әлеуметтік әділеттілікті қамтамасыз етуге, тұрғындардың өмір сапасын арттыруға және Тәуелсіздік мерекесінің мәнін тереңдетуге бағытталған.
