Түркістанда 18 қазан – Рухани келісім күніне орай облыстағы діни конфессия басшыларының қатысуымен салтанатты кездесу ұйымдастырылды. Жиынға Түркістан облыстық дін істері басқармасының басшысы Рүстем Сабыржанұлы жетекшілік жасап, кездесуді жүргізді. Ол өңірдегі діни конфессиялардың өзара ынтымақ-бірлігі мен қоғамдағы рөлін атап өтті, дінаралық татулықты нығайту бағытында атқарылып жатқан жұмыстарға тоқталды.
Кездесу барысында Қазақстан мұсылмандары діни басқармасының Түркістан облысы бойынша өкіл имамы Ержан Төлепов, Шымкент және Түркістан епархиясының «Шіркеудің қоғаммен байланыс» жөніндегі бөлімінің басшысы Александр Могилевский, «Орыс православиелік шіркеуінің Мәскеу Патриархаты Шымкент епархиясының Свято-Никольский приходы» жергілікті православиелік діни бірлестігінің жетекшісі Алексей Лазутин Анатольевич және басқа да дін өкілдері сөз сөйлеп, өз тәжірибелерімен бөлісті. Олар өңірде дінаралық диалогты нығайту, жастар арасында толеранттық пен сыйластықты насихаттау, әлеуметтік жобаларға бірлесіп атсалысу, сондай-ақ мешіттер мен шіркеулердің әлеуметтік бастамаларға қатысуы қажеттігін атап өтті.
Кездесу соңында діни конфессиялар жетекшілеріне мерекеге орай алғыс хаттар мен естелік сыйлықтар табыс етілді. Сонымен қатар, басқарма өкілдері облыстық деңгейде жыл бойы дінаралық келісім мен татулықты сақтау бағытында атқарылатын іс-шаралар жоспарын таныстырды. Бұл жоспарға семинарлар, дөңгелек үстелдер, жастар форумы мен волонтерлік жобалар кіреді.
Айта кетейік, 1992 жылғы 18 қазан Алматы қаласында Бүкіләлемдік Рухани келісім конгресінің 1-сессиясы өтті. Конгреске қатысушылар қазанның 18-ін «Рухани келісім күні» деп жариялады. Бұл күн қақтығыстар мен жанжалдарға шектеу қою, жақындарға қайырымдылық жасау және халық арасында татулық пен бірлікті насихаттау күні ретінде белгіленді. Содан бері жыл сайын елімізде 18 қазан – «Рухани келісім күні» мемлекеттік деңгейде аталып келеді.
Түркістан облысында бұл күн әрқашан жоғары деңгейде өткізіліп, дінаралық ынтымақтастық пен қоғамдағы бейбіт өмірдің маңызын дәріптейді. Облыс әкімдігі мен дін істері басқармасы бұл бағыттағы жұмыстарды тұрақты жүргізіп, жергілікті тұрғындардың бірлігін, дінаралық сыйластық пен рухани құндылықтарды сақтау үшін жаңа жобалар мен кездесулерді жыл бойына жоспарлауда.
Сонымен қатар, өңірдегі мектептерде және жастар орталықтарында толеранттық пен конфессияаралық келісім тақырыбында сабақтар мен тренингтер өткізіледі. Діни бірлестіктердің қатысуымен әлеуметтік, мәдени және қайырымдылық жобалар іске қосылып, тұрғындарға гуманитарлық көмек көрсету, білім беру және спорттық іс-шаралар ұйымдастыру сияқты бағыттар да қолдау табуда.
Бұл іс-шара Түркістан облысындағы көпконфессиялық қоғамның бейбіт өмірін сақтау, жастарды дұрыс жолға бағыттау, халық арасында сыйластық пен төзімділікті қалыптастыруға бағытталған нақты қадам ретінде бағаланады. Рухани келісім күніне орай ұйымдастырылған кездесулер мен жобалар өңірде тұрақтылықты нығайтып, дінаралық татулықты арттыруға үлес қосуда.
