Түркістан облысы туристік салада цифрлық трансформацияны енгізу арқылы өңірге келетін туристерге қолайлы жағдай жасауға бағытталған нақты жұмыстар жүргізіп жатыр. Бұл бағыт туристік инфрақұрылымды жақсарту, туристер санын арттыру және инвестиция тарту үшін аса маңызды.
Цифрлық жүйелер енгізілуде
Орналастыру орындарына келген шетелдік туристерді тіркеу мақсатында «E-qonaq» ақпараттық жүйесі енгізілді. Қазіргі таңда 245 орналастыру орнының 177-і жүйеге тіркеліп, туристік деректер автоматтандырылды.
Сондай-ақ, Түркістанның 60-тан астам туристік нысаны мен 40 қонақ үйі TripAdvisor халықаралық платформасында тіркеліп, өңірге қызығушылықты арттырды. Нәтижесінде Түркия, Ресей, Малайзия нарықтарында Түркістан туралы 2 миллион қаралым жиналды.
Izi.Travel халықаралық туристік порталы мен мобильді қосымшасына облыстың ТОП-100 туристік нысаны бойынша 3 тілде аудиогидтер (қазақ, орыс, ағылшын) жүктелді. Қосымша офлайн режимде де жұмыс істейді.
Туристер үшін пайдалы ақпарат алу мақсатында www.openturkistan.com интернет-порталы іске қосылды. Порталда Түркістан облысының туристік әлеуеті толық қамтылып, үш тілде ақпарат ұсынылады.
Туризм саласына мамандар даярлау
Түркістан облысында Халықаралық туризм және меймандостық университеті орналасқан. Оқу процесі 60% кәсіпорындарда, 40% жоғары оқу орнында жүргізіледі. Бұл университет Қазақстанда 4 жылдық білім беру жүйесінен 3 жылдық жүйеге өткен жалғыз мамандандырылған жоғары оқу орны.
Мамандық бойынша бітірген 460 түлектің 428-і (93%) өз мамандығы бойынша жұмысқа орналасқан. Бұл көрсеткіш туризм саласындағы кадрлық әлеуеттің жоғары екенін дәлелдейді.
Туристік инфрақұрылымды жақсарту
2024 жылы туристік нысандарға барар жолдарды жөндеу мақсатында жалпы соммасы 16,5 млрд теңге болатын 7 жоба іске асырылды. 2025 жылы тағы 11,3 млрд теңге құрайтын 6 жоба жүзеге асыру жоспарланған. Атап айтқанда, Түркістан-Арыстанбаб және Сауран қалашығына бұрылыс алаңдарын орнату жұмыстары жүргізілуде.
Жол бойындағы сервис қызметін жақсарту мақсатында Qazaq Oil компаниясы 2029 жылға дейін Қазақстан Республикасының аумағында 60 мотель салуды жоспарлап отыр. Түркістан облысында жобалық құны 1–1,2 млрд теңге болатын 30–50 нөмірлік мотельдер салу арқылы кемінде 8 жаңа жұмыс орны ашылуы көзделген.
Қорытынды
Цифрландыру және инфрақұрылымды жақсарту арқылы Түркістан облысы туризм саласын жаңа деңгейге көтеруге ұмтылуда. Туристік ақпараттық жүйелер, онлайн платформалар, аудиогидтер мен сапалы жолдар туристер үшін ыңғайлы жағдай жасап, облыстың халықаралық туристік тартымдылығын арттыруға мүмкіндік береді.
