Түркістан қаласында 570 орындық көпбейінді аурухананың құрылысы қарқынды түрде жүргізілуде. Жоба Түркиялық «YDA Group» компаниясының жеке бастамасы негізінде жүзеге асырылып жатыр және аймақтың медициналық инфрақұрылымын нығайтуға бағытталған стратегиялық жоба болып саналады.
Түркістан облысына ресми іс-сапары барысында ҚР Премьер-министрінің орынбасары Қанат Бозымбаев облыс әкімі Нұралхан Көшеровпен бірге құрылыс алаңына барып, нысанның жұмыс барысын тексерді. Мердігер компанияның өкілдерімен кездесу барысында жобаның ағымдағы жағдайы, құрылыс кезеңдері және толық аяқталу мерзімі талқыланды.
Қанат Бозымбаев құрылыс жұмыстарының сапасына ерекше көңіл бөліп, барлық инженерлік желілердің, электр және су жүйелерінің, желдету мен қауіпсіздік жүйелерінің толықтай іске қосылуын қамтамасыз етуді тапсырды. Сонымен қатар, нысанның медициналық қызмет көрсету сапасын арттыру үшін қажетті технологиялық жабдықтар мен заманауи құрал-жабдықтарды уақытылы жеткізу мәселесі пысықталды.
Облыс әкімі Нұралхан Көшеров заманауи медициналық жабдықтармен қамтамасыз ету, мамандар даярлау және кадр мәселесін алдын ала шешу қажеттігін атап өтті. Аурухана болашақта өңірлік деңгейдегі жоғары технологиялы емдеу қызметін ұсынатын орталыққа айналуы тиіс. Осыған сәйкес, медициналық персоналды даярлау, қызмет сапасын арттыру және денсаулық сақтау жүйесінің тиімділігін арттыру бағытында нақты жоспарлар әзірленіп жатыр.
Құрылысы жүргізіліп жатқан нысан 15,6 гектар аумақта орналасқан. 7 қабатты ғимараттың жалпы ауданы 83 277 шаршы метрді құрайды. Құрылыстың әр қабатында заманауи операциялық блоктар, палаталар, диагностика және емдеу бөлімшелері, дәрі-дәрмек қоймалары, конференц-залдар мен қызметтік бөлмелер қарастырылған.
Бүгінде құрылыс жұмыстарының 87 пайызы аяқталған. Қалалық әкімдік пен мердігер компанияның тұрақты бақылауы нәтижесінде, құрылыс сапасы мен технологиялық стандарттарға сай жүргізілуде. Аурухананың пайдалануға берілуі келесі жылы жоспарланып отыр.
Аурухананың іске қосылуы Түркістан облысының тұрғындары үшін медициналық қызметтердің қолжетімділігін арттырып қана қоймай, аймақтық деңгейде жоғары технологиялы емдеу орталығының құрылуына жол ашып, өңірдің әлеуметтік-экономикалық дамуына қосымша серпін бермек.
Жобаның маңыздылығы – аурухана тек емдеу қызметін ұсынумен шектелмей, медициналық кадрларды дайындау, ғылыми-зерттеу жұмыстарын жүргізу және инновациялық медициналық технологияларды енгізу бағытында да жұмыс істейтін болады. Бұл Түркістан қаласын денсаулық сақтау саласында озық тәжірибеге ие аймаққа айналдыруға ықпал етеді.
