Жас педагогтердің кәсіби бейімделуін қолдау мақсатында Шымкент қаласы білім басқармасына қарасты №143 жалпы білім беретін мектепте психологиялық тренинг ұйымдастырылды. Бұл іс-шара білім беру саласындағы халықаралық ғылыми тұжырымдамаларға сәйкес жас мамандардың эмоционалдық тұрақтылығын қалыптастыру, кәсіби дамуына бағыт беру және қолайлы психологиялық орта қалыптастыруға арналды.
Тренингтің негізгі мақсаты – жас мұғалімдердің кәсіби ортасына тез бейімделуін қамтамасыз ету, кәсіби құндылықтарын анықтау, бір-бірімен тиімді қарым-қатынас орната білу, сондай-ақ олардың ішкі мотивациясы мен сенімділігін арттыру. Педагогикалық ұжым ішінде кәсіби ынтымақтастық пен қолдау мәдениетін қалыптастыру да басты назарда болды.
Іс-шара барысында қатысушылармен өзін-өзі тануға, эмоцияны басқаруға, күйзелістің алдын алуға бағытталған тәжірибелік тапсырмалар мен психологиялық жаттығулар жүргізілді. Жас мамандар кәсіби тұлғалық дамуға қатысты ойларымен бөлісіп, рефлексия арқылы болашақ кәсіби жоспарларын жүйелеуге мүмкіндік алды. Әсіресе сенімге негізделген қарым-қатынас орнату, өзіндік құндылықтарын анықтау және кәсіби мақсат қою секілді тақырыптар кеңінен талқыланды.
Тренинг барысында қолданылған әдіс-тәсілдер халықаралық білім беру кеңістігінде мойындалған кәсіби даму бағдарламаларына, атап айтқанда мұғалімдердің кәсіби рефлексиясына, өзін-өзі реттеуге және эмоционалдық интеллектіні дамытуға бағытталған тәжірибелерге негізделді. Жас педагогтер заманауи білім беру процесіндегі мұғалімнің рөліне жаңаша көзқарас қалыптастырып, педагогикалық қызметтің құндылықтық негіздерін терең түсіне түсті.
Тренинг соңында қатысушылар өзара жылы лебіздерін білдіріп, кәсіби қолдау мен сенімділік алаңын қалыптастырудың маңыздылығын атап өтті. Мұндай іс-шаралар педагогтердің ұзақ мерзімді кәсіби өсуі мен тиімді қызмет атқаруына қолайлы жағдай туғызады. Сонымен қатар білім беру ұйымында жағымды психологиялық климат құруға, педагогтің кәсіби әлеуетін толық ашуға мүмкіндік береді.
№143 жалпы білім беретін мектеп әкімшілігі алдағы уақытта да жас мамандардың кәсіби бейімделуіне бағытталған тренингтер мен семинарларды жүйелі түрде ұйымдастыруды жалғастырмақ. Бұл – тұрақты білім беру ортасын қалыптастыру, мұғалімнің кәсіби даму әлеуетін арттыру және сапалы білім берудің негізгі көрсеткіштерінің бірі.
