Кентау қаласында «Заң мен тәртіп» қағидасы аясында жастар мен қала тұрғындарына арналған «Жасырын қауіп – вейп» атты кездесу ұйымдастырылды. Іс-шара Түркістан облысы бойынша Экономикалық тергеп-тексеру департаментінің бастамасымен және Кентау қалалық Жастар ресурстық орталығының ұйымдастыруымен өтті.
Кездесудің негізгі мақсаты – жастар арасында денсаулыққа зиянды әдеттердің, соның ішінде вейп өнімдерінің алдын алу, тұрғындардың құқықтық сауаттылығын арттыру және көлеңкелі экономикамен байланысты жаңа түрдегі қылмыстарға қоғамның назарын аудару болды.
Кездесуге Департаменттің Ұйымдастыру-бақылау басқармасының басшысы Х.Р. Маматаев, Кентау қаласы әкімінің орынбасары, Полиция бөлімінің бірінші орынбасары, сондай-ақ әртүрлі санаттағы қала тұрғындары қатысты.
Жиын барысында Департамент қызметкері вейптің адам денсаулығына тигізетін зияны туралы баяндама жасап, жасөспірімдер арасында электронды темекінің таралу қаупін түсіндірді. Сонымен бірге интернет-алаяқтық пен «дроп» арқылы жасалатын қылмыстардың тетіктері мен салдары талқыланды.
Кездесу соңында қала тұрғындары өздерін толғандырған сұрақтарын қойып, сала мамандарынан толыққанды әрі қанағаттанарлық жауаптар алды.
