Шымкент қаласы білім басқармасына қарасты «Есту қабілеті бұзылған балаларға арналған №2 арнайы мектеп-интернатының» директоры Сәуле Тұрарбекқызы Жүнісбекова Қазақстан Республикасы Оқу-ағарту министрлігінің «Білім беру ісінің құрметті қызметкері» төсбелгісімен марапатталды. Бұл — білім беру саласында көп жылғы үздіксіз еңбегімен ерекшеленген, кәсіби біліктілігі мен жаңашылдығы арқылы талай жетістікке жеткен басшының ерен еңбегіне берілген әділ баға.
Сәуле Тұрарбекқызы — білім беру саласында 38 жылдан астам уақыт бойы абыроймен қызмет етіп келе жатқан тәжірибелі педагог. Оның 21 жылдық басшылық қызметі Шымкент қаласындағы ерекше білім беру қажеттіліктері бар балаларға арналған мекеменің дамуымен тығыз байланысты. Осы жылдар ішінде ол басқарған мектеп-интернат кәсіби тұрғыда өсіп, білім сапасы мен тәрбиелік бағыты тұрақты түрде жоғары деңгейде қалыптасты.
Есту қабілеті бұзылған балаларды оқыту — тек білім беру ғана емес, бұл – жан дүниені түсіне білу мен ерекше педагогикалық әдістеме талап ететін күрделі жұмыс. Бұл бағытта қажырлы еңбек етіп жүрген Сәуле Тұрарбекқызы өз саласына жан-тәнімен берілген, ерекше миссияны абыроймен атқарып жүрген басшы. Оның басшылығымен мектеп-интернат ұжымы оқу-тәрбие процесін жетілдіруде, инклюзивті білім беру талаптарын жүзеге асыруда ауқымды жетістіктерге қол жеткізіп келеді.
Мектеп-интернатта есту қабілеті шектеулі балаларға арнайы бағдарлама бойынша сапалы білім мен тәрбие беру үшін қолайлы жағдай жасалған. Мұнда оқушылар тек академиялық білім алып қана қоймай, түрлі шығармашылық және спорттық бағыттағы үйірмелерге қатысып, өз қабілеттерін дамыту мүмкіндігіне ие. Сәуле Тұрарбекқызы білім беру мазмұнын жаңарту, инклюзивті ортаны нығайту және педагог кадрлардың кәсіби дамуына үнемі назар аударып келеді. Оның бастамасымен мектепте заманауи технологиялар мен оқыту әдістемелері кеңінен енгізіліп, ұстаздардың біліктілігін арттыру жүйелі жолға қойылған.
Сәуле Жүнісбекованың бастамашылдығы мен ұйымдастырушылық қабілетінің арқасында мектеп ұжымы түрлі қалалық, облыстық, республикалық деңгейдегі байқауларда, ғылыми жобаларда, спорттық және мәдени жарыстарда үздік нәтижелер көрсетіп жүр. Бұл – мектеп қабырғасындағы білім мен тәрбиенің тиімді жүйеге негізделгенін көрсететін маңызды көрсеткіш.
Мұндай марапат – тек жеке тұлғаның емес, тұтас білім беру ұйымының, соның ішінде арнайы білім беруге арналған мекемелердің де қоғамдағы орнын айқындайтын үлкен көрсеткіш. Шымкент қаласындағы №2 арнайы мектеп-интернаты бүгінде ерекше білім беру қажеттілігі бар балаларды оқыту мен тәрбиелеу ісінде үздік тәжірибелерді енгізіп отырған жетекші мекемелердің бірі саналады.
Мемлекет басшысы Қасым-Жомарт Тоқаевтың білім саласына қатысты ұстанымында «Әр бала — құнды, әр маман — маңызды» деген тұжырым бар. Бұл қағидат бүгінгі таңда жүзеге асып жатқан игі істер мен марапаттардан анық көрініс табуда. Сәуле Тұрарбекқызына берілген «Білім беру ісінің құрметті қызметкері» төсбелгісі — сол ұстанымның шынайы көрінісі.
