Шымкент қаласы білім басқармасына қарасты Гагарин атындағы №34 мектептің биология пәні мұғалімі, педагог-зерттеуші Зухра Тайырқызы Нажиметова “Ерен еңбегі үшін” медалімен марапатталды. Бұл — ел ертеңі болатын жас ұрпақты тәрбиелеуге бар ғұмырын арнаған ұлағатты ұстаз еңбегіне берілген жоғары баға.
Зухра Тайырқызы – биология пәнін оқытуда терең ғылыми-әдістемелік тәжірибесі бар, кәсіби біліктілігі жоғары педагог. Ол 39 жыл бойы білім беру саласында қажырлы еңбек етіп келеді. Осы жылдар ішінде өзінің табанды еңбегімен, шығармашылық көзқарасымен, ізденімпаз мінезімен оқушылар мен әріптестерінің құрметіне бөленіп, білім беру жүйесінде биік белестерді бағындырды.
Педагог-зерттеуші ретінде Зухра Нажиметова білім берудегі заманауи үрдістер мен әдістемелерді шебер қолданып, оқыту сапасын арттыруға үнемі көңіл бөліп келеді. Оның сабақтары мазмұн тереңдігімен, ғылыми жаңашылдығымен және оқушылардың ойлау қабілетін дамытуға бағытталған әдіс-тәсілдердің тиімді қолданылуымен ерекшеленеді. Әр сабағында оқушының жеке қабілетін ашуға, олардың пәнге деген қызығушылығын оятуға баса мән береді. Мұғалімнің кәсіби шеберлігінің арқасында шәкірттері аудандық, қалалық, республикалық деңгейдегі олимпиадалар мен ғылыми жобалар сайысында жоғары нәтижелерге қол жеткізіп жүр.
Зухра Тайырқызы – білім саласында өз жолын тапқан ұстаз ғана емес, жас педагогтердің жанашыры, бағыт-бағдар берушісі. Жас мамандарға тәлімгерлік жасап, тәжірибесін бөлісіп, әдістемелік көмек көрсетіп отырады. Оның кәсіби қолдауы мен ақыл-кеңесі көптеген жас мұғалімдердің біліктілігін арттырып, педагогикалық шеберліктерін дамытуға оң әсерін тигізді.
Ұстаздың еңбегі тек оқыту ісімен шектелмейді. Зухра Нажиметова — мектептің қоғамдық және тәрбиелік жұмыстарында да белсенділік танытып келеді. Ол оқушылардың патриоттық рухта тәрбиеленуіне, ұлттық құндылықтарды бойына сіңіруіне ерекше мән береді. Шәкірттерінің бойына адамгершілік пен ізгілік ұрығын себу — оның басты өмірлік қағидасына айналған. Жан жылуы мен ұстаздық махаббатын оқушылардың жүрегіне жеткізе білетін Зухра Тайырқызы — шын мәнінде нағыз ұлағат иесі.
Мұғалімнің көп жылғы еңбегі түрлі марапаттармен, алғыс хаттармен және грамоталармен бағаланды. Ал “Ерен еңбегі үшін” медалі — оның кәсіби шеберлігі мен адал қызметінің мемлекет тарапынан мойындалуының айқын көрінісі.
Бүгінде Зухра Нажиметова — еңбек жолында тоқтаусыз ізденумен, үнемі дамуға ұмтылумен, жас буынды тәрбиелеуге деген жауапкершілігімен ерекшеленетін тұлға. Ол — шәкірт жүрегіне ізгілік пен білім нұрын ұялатқан, әрдайым іскерлігімен, парасатымен, білімге деген шынайы сүйіспеншілігімен үлгі бола білетін ұстаз.
Жетістік пен табыс — бір күнде келетін нәтиже емес. Бұл — жылдар бойғы тынымсыз еңбектің, маңдай тердің, өз ісіне деген сүйіспеншіліктің жемісі. Зухра Тайырқызының өнегелі еңбек жолы – жас ұрпаққа білім мен тәрбие беру жолындағы адал қызметтің, шынайы ұстаздықтың жарқын үлгісі.
