2025-2026 жаңа оқу жылы қарсаңында еліміздегі білім беру жүйесінде маңызды науқан – 1-сыныпқа қабылдау қарқынды жүргізілуде. Бұл – әрбір бала мен ата-ана үшін ерекше әрі жауапты кезең. Білім берудің алғашқы баспалдағы саналатын 1-сыныпқа қабылдау үдерісі биыл жаңашылдықтармен, цифрлық шешімдермен және қолдау шараларымен ерекшеленіп отыр.
2025 жылы еліміз бойынша 1-сыныпқа қабылдау жоспары – 27 546 оқушыны құрады. Тамыз айының ортасындағы мәліметке сәйкес, бүгінгі күнге дейін 23 041 бала қабылданып, жоспардың 83,6%-ы орындалды.
Барлық қабылдау үдерісі 303 мектепте жүргізілуде. Оның ішінде:
- 162 мемлекеттік мектеп (жалпы контингенті – 206 317 оқушы),
- 141 жеке меншік мектеп (жалпы контингенті – 64 806 оқушы).
Бұл көрсеткіш еліміздің білім беру жүйесіндегі әртүрлілік пен ата-аналарға таңдау еркіндігінің кеңейіп келе жатқанын көрсетеді.
Әлеуметтік тұрғыдан осал отбасылардан шыққан балалар үшін жыл сайын өткізілетін «Мектепке жол» республикалық акциясы аясында биыл да ауқымды көмек көрсетілуде. Акция мақсаты – барлық баланың тең дәрежеде мектепке дайын болуын қамтамасыз ету.
- 56 430 балаға материалдық көмек көрсетілді;
- Бұл мақсатқа 2,624 млрд теңге бюджет қаражаты бөлінді;
- Әр балаға орта есеппен 46 500 теңге мөлшерінде көмек берілді.
Айта кету керек, биыл жекеменшік мектептерде оқитын әлеуметтік осал санаттағы балалар да осы акция аясында қамтылды. Бұл – білім беру теңдігін қамтамасыз етудегі маңызды қадам.
2025 жылы алғаш рет 6 өңірде ваучерлік қаржыландыру тетігі бойынша пилоттық жоба іске қосылды. Бұл жоба ата-аналарға білім беру ұйымын еркін таңдау мүмкіндігін беріп, білім беру сапасын арттыруға бағытталған.
Жаңа жүйе негізінде:
- Мемлекеттік қаражат оқушының соңынан жүреді (яғни, қай мектепке барса, сол мектепке ваучермен қаржы түседі);
- Ата-аналар жеке немесе мемлекеттік мектепті таңдай алады;
- Мектептер арасында әділ бәсекелестік қалыптасып, қызмет сапасы артады.
Бұл пилоттық жоба алдағы уақытта оң нәтиже берсе, еліміздің барлық аймағында енгізілуі мүмкін.
1-сыныпқа қабылдау үдерісін автоматтандыру арқылы ата-аналар үшін барынша ашық әрі ыңғайлы жағдай жасалды:
- Жеке сәйкестендіру нөмірі (ЖСН) арқылы тіркелу жүзеге асырылады;
- Бос орындар мен кезек туралы ақпарат ашық көрсетіледі;
- Баланың мектепке нақты барғанын Face ID технологиясы арқылы растау мүмкіндігі қарастырылған.
Мұндай технологиялық шешімдер ата-аналардың уақытын үнемдеуге, адами факторды азайтуға және қабылдау рәсімін барынша әділ әрі тиімді етуге мүмкіндік береді.
Құрметті ата-аналар мен заңды өкілдер, 1-сыныпқа қабылдау процесі жалғасуда. Сіздерді өз уақытымен құжаттарды рәсімдеп, ресми тіркелу жүйесі арқылы өтінім беруге шақырамыз. Баланың мектептегі алғашқы қадамы – болашағына жасалған инвестиция екенін ұмытпаңыздар.
Мемлекет тарапынан білім беру саласын қолдауға, оның ішінде мектепке дейінгі және бастауыш білімге ерекше көңіл бөлініп отыр. Әрбір баланың сапалы білім алуына мүмкіндік беру – баршаға ортақ міндет.
