2025 жылы Өзбекәлі Жәнібеков атындағы Оңтүстік Қазақстан педагогикалық университетінің профессоры, PhD доктор, белгілі математик Иманбаев Нұрлан Сайрамұлы — Қазақстан ғылымының беделін халықаралық деңгейде танытып жүрген көрнекті ғалым ретінде Kazakh National H-index Ranking жаңартылған нәтижесі бойынша ТОП-1000 тізіміне енді. Ол жалпы рейтингте 785-орынға тұрақтап, университет атынан аталған тізімге енген жалғыз ғалым атанды.
Kazakh National H-index Ranking (NHR) — қазақстандық ғалымдар, ғылыми ұйымдар мен зерттеу топтарының ғылыми өнімділігін бағалайтын тәуелсіз рейтингтік жүйе. Бұл рейтинг әлемдік ғылыми қауымдастықта кеңінен қолданылатын Хирш индексіне (h-индекс) негізделеді.
h-индекс – ғалымның жарияланған еңбектерінің саны мен сол еңбектерге сілтемелер санына қарай есептелетін, ғылыми беделділік пен өнімділікті көрсететін негізгі ғылыми-метрикалық көрсеткіштердің бірі.
NHR рейтингі — Қазақстан аясында жүргізілетін салыстырмалы талдауға негізделген ұлттық ғылыми көрсеткіштер жүйесі, әрі еліміздегі ғылымның сапасын бағалауда маңызды құрал болып табылады.
Иманбаев Нұрлан – отандық математиканың бренді.
Профессор Иманбаев Нұрлан Сайрамұлы — математикалық талдау, функционалдық кеңістіктер теориясы, жаратылыстану бағытындағы қолданбалы зерттеулер саласында танымал ғылыми мектептің өкілі. Ол еліміздің және шетелдік беделді басылымдарда 50-ден астам ғылыми мақалалар жариялаған, ғылыми жетекшілік жасап жүрген шәкірттері халықаралық олимпиадалар мен байқауларда жүлделі орындарға ие болып жүр.
Сонымен қатар, профессор Иманбаев — ғылыми қауымдастыққа белсенді мүше ретінде Қазақстанның білім мен ғылым саласының дамуына өзіндік үлесін қосып келеді.
Ө. Жәнібеков атындағы ОҚПУ ұжымы профессор Иманбаевтың бұл жетістігін ерекше қуанышпен қабылдады. Университет ректоры:
«Бұл — тек бір ғалымның емес, бүкіл университетіміздің ғылымдағы әлеуетінің көрсеткіші. Ғылыммен шынайы айналысатын тұлғаларды қолдау – біздің басты басымдығымыз. Нұрлан Сайрамұлының жетістігі жас ғалымдарға үлгі болады деп сенеміз», — деді.
Бұл нәтиже — отандық ғылымды дамыту жолында табанды еңбек етіп жүрген тұлғаларға берілген лайықты баға. Профессор Иманбаевтың TOP-1000 құрамынан көрінуі — университет ғылымының даму бағытының дұрыс екенінің дәлелі және өзге жас ғалымдарға үлкен серпін беретін зор мәртебе.
