Шымкент қаласының Болашақ жоғары колледжінде «Қарттары бар елдің қазынасы бар» тақырыбында маңызды кездесу өтті. Бұл шараның басты мақсаты – аға буын мен жас ұрпақ арасындағы байланысты нығайтып, ардагерлердің өмірлік тәжірибесі мен құнды кеңестерін жастарға жеткізу. Кездесуді ұйымдастыруға «Бәйтерек» жастар ұйымы қоғамдық бірлестігі мен Шымкент қаласының ішкі саясат және жастар істері жөніндегі басқармасы ұйытқы болды. Бұл – ұрпақтар сабақтастығын нығайтуға арналған ерекше жобалардың бірі.
Іс-шараға Шымкент қалалық Ардагерлер кеңесінің төрағасы К.А. Төлебаев, «Бәйтерек» жастар ұйымы қоғамдық бірлестігінің төрағасы Ролан Қонысбеков, колледж жастары, оқу орнының басшылығы және оқытушылары қатысты. Ардагерлер мен жастардың бірлескен кездесуі ерекше ықыласпен өтті, себебі бұл – ұрпақтар арасындағы тәжірибе алмасудың және құндылықтарды сақтаудың тамаша мүмкіндігі.
Кенжехан Төлебаев өз сөзінде ардагерлердің еліміздің дамуы мен тәуелсіздігін нығайтудағы рөліне тоқталып, жас ұрпаққа Отанға адал қызмет ету туралы кеңес берді. Ардагерлер қоғамдағы рөлдерін түсіндіре отырып, жастардың алдында ұлттық құндылықтарды сақтап, жауапкершілікпен қарау керектігін айтты.
Сонымен қатар, «Бәйтерек» жастар ұйымының төрағасы Ролан Қонысбеков те сөз сөйлеп, «Мұндай кездесулердің маңыздылығын атап өтті. Ол жастардың рухани және патриоттық тәрбиесіне баса назар аудару қажеттігін айтты, себебі ұлттық құндылықтар мен тарихи мұраларды сақтау – әр азаматтың борышы», – деді.
Кездесу барысында колледж жастары ардагерлерге өздерінің сұрақтарын қойып, өмірлік тәжірибе мен кеңестерге құлақ асты. Бұл диалог жастарға терең ой салды, ардагерлерден үйренген нәрселері алдағы өмірлеріне бағыт-бағдар болары анық.
Іс-шара соңында колледж ұжымы мен студенттері ардагерлерге өз алғыстарын білдіріп, олардың өнегелі өмір жолын үлгі тұтатындықтарын атап өтті. Мұндай кездесулер алдағы уақытта да жалғасын табады деп күтілуде, себебі олар жастарға өз тарихын ұмытпай, болашаққа сеніммен қадам басуға септігін тигізеді.
«Қарттары бар елдің қазынасы бар» жобасы аясындағы бұл кездесу ұрпақтар сабақтастығын нығайтуға, ардагерлердің бай тәжірибесін жастарға жеткізуге үлкен үлес қосты.
