Түркістан облысы қоғамдық даму басқармасының ұйымдастыруымен Бәйдібек ауданында «Қайырымды іс – жан азығы» акциясы аясында ізгілік пен адамгершілік құндылықтарын дәріптеуге бағытталған шара өтті.
Бастаманың негізгі мақсаты – ерекше балалар мен олардың отбасыларына қолдау көрсету, қоғамдағы мейірімділік мәдениетін қалыптастыру және қайырымдылықтың маңызын кеңінен насихаттау. Сонымен қатар көмекке мұқтаж жандарға қолдау көрсетіп, әлеуметтік жобаларға белсенді араласып жүрген азаматтардың игі істерін көпшілікке үлгі ету көзделді.
Акция аясында қайырымдылық жасап жүрген азаматтардың қоғам игілігіне бағытталған бастамалары туралы ақпараттар ұсынылып, олардың жанашырлықпен атқарып жүрген еңбегі насихатталды. Сондай-ақ ерекше балалардың шығармашылығы мен жетістіктерін бейнелейтін фотокөрме ұйымдастырылып, олардың қабілеті мен таланты көпшілік назарына ұсынылды.
Қайырымдылық – тек көмек беру ғана емес, ол – адамның өзгеге деген құрметі мен жанашырлығын білдіретін үлкен адамгершілік қасиет. Әсіресе ерекше балаларға көңіл бөліп, олардың мүмкіндіктерін қолдау – қоғамның ортақ жауапкершілігі.
Осындай игі бастамалар адамдарды бір-біріне қамқор болуға, жақсылық жасауға және әлеуметтік мәселелерге бейжай қарамауға үндейді. Әрбір жылы сөз, әрбір қолдау мен әрбір ізгі әрекет қоғамдағы мейірімнің артуына септігін тигізеді.
Жақсылық – жүректен шығады. Ал жүректен шыққан қайырымды іс өзгенің өміріне үміт пен қуаныш сыйлайды.
«Қайырымды іс – жан азығы» акциясы аясындағы жұмыстар алдағы уақытта да жалғасып, қайырымдылық пен қолдауды қажет ететін азаматтарға бағытталған игі бастамалар жүзеге асырыла береді.
