Түркістан облысының соңғы жылдардағы әлеуметтік-экономикалық дамуы өңірдің өндірістік әлеуетінің күшейіп келе жатқанын айқын көрсетіп отыр. Халық саны мен бизнес қарқыны жыл сайын артып отырған аймақта индустриялық аймақтар, білім беру нысандары, инфрақұрылым және ауыл шаруашылығы бағытында жүзден астам жоба жүзеге асуда. Дегенмен, қарқынмен бірге бақылау мен нақты жоспарлаудың да қажеттілігі туындайды. Осы мақсатта облыс әкімінің орынбасары Талғат Қозбековтің төрағалығымен өткен кеңейтілген мәжіліс өңірдің даму бағытын айқындауда маңызды алаңға айналды.
Жиында өңір экономикасының өзекті көрсеткіштері, инвестиция тарту деңгейі, кәсіпкерлерге берілетін несиелердің тиімділігі, өндіріс орындарының ахуалы және проблемалық жобалардың жай-күйі талқыланды. Мамандардың есебі бойынша биыл облыста қолға алынған 121 жобаның 41 пайызы уақытында орындалып, нәтижесін беріп отыр. Алайда, қала және аудан деңгейінде шешімін күткен 14 жоба бар. Бұл – бақылау, жоспарлау және жергілікті деңгейдегі ұйымдастыру жұмыстарының әлі де жетілдіруді қажет ететінін көрсетеді.
Талғат Қозбеков жиында мәселенің кабинетте емес, оқиға орнында шешілуі керектігін қатаң атап өтті. Бұл басқару мәдениетіндегі жаңа көзқарас екені анық. Өйткені, өңірдегі кез келген түйткілді сол жерде жедел пысықтау — жұмыстың сапасын арттырып, халыққа көрсетілетін қызметтің тиімділігін жоғарылатады.
Өңір экономикасының негізгі драйверлерінің бірі – индустрия. Биыл таныстырылған жобалардың ішінде еңбек нарығына да, өңірлік экспортқа да үлес қоса алатын өндіріс орындары бар. Мәселен, Кентауда іске қосылуы жоспарланған «Bereke Құрылыс Сервис» ЖШС-ның тұрмыстық химия мен қағаз майлықтар шығару жобасы өңірдің жеңіл өнеркәсібін дамытатын жаңа қадам. Құны 360 млн теңге болатын бұл кәсіпорын жаңа жұмыс орындарының ашылуына да, ішкі нарықты отандық өніммен толықтыруға да мүмкіндік береді.
Ал Түлкібастағы «Састөбе химиялық кешені» – өңір ғана емес, республика деңгейіндегі өндірістік серпіліс болмақ. Каустикалық сода, ПВХ, цемент, карбид кальций сынды жоғары сұраныстағы өнімдерді өндіру – еліміздің химия өнеркәсібіндегі ірі қадамдардың бірі. Ең маңыздысы – жоба толық іске қосылса, 500 адам тұрақты жұмысқа орналасады.
Түркістан облысы бүгінгі таңда тек әкімшілік орталық ретінде емес, экономикалық және индустриялық хабқа айналып келеді. Жүзден астам жобаның жүзеге асуы – өңірдің қарқынды дамуының айғағы. Ал бүгінгі мәжіліс сияқты жүйелі талқылаулар алдағы жылдары да атқарылар жұмыстың сапасын арттыруға мүмкіндік береді.
