2025 жылы Түркістан облысында ауыл шаруашылығы жаңа биіктерге жетті. Жалпы 907 мың гектар егіс алқабы егілсе, оның 114 мың гектары заманауи су үнемдеу технологиялары арқылы суарылды. Тамшылатып және жаңбырлатып суару әдістері енгізілген алқаптарда өнімділік айтарлықтай артты, суды пайдалану көлемі екі есе төмендеді.
Мәселен, биыл мақта дақылы 52,2 мың гектарға тамшылатып суарылды. Бұрын гектарына 5,2 мың м³ су қажет болса, жаңа технологиямен бұл көлем 2,6 мың м³-ке дейін азайды. Өнімділік екі есеге өсті. Күріш дақылы да пилоттық жобамен егіліп, гектарына 4–5 тонна өнім берді, ал келесі жылдары бұл көрсеткіш 6–7 тоннаға дейін жетеді деп жоспарлануда.
Облыс бойынша дәнді дақылдар – 342 мың га, майлы дақылдар – 73 мың га, көкөніс пен картоп – 55,9 мың га, бақша дақылдары – 62 мың га, мал азықтық дақылдар – 229,9 мың га, мақта – 144,5 мың га егілді. Жанар-жағармай жеткізу мен минералды тыңайтқыштарды уақытылы енгізу арқасында дала жұмыстары белгіленген межеге сәйкес жүргізілді.
Аграрлық салаға бөлінген қаржы көлемі 26,4 млрд теңгені құрады, бұл өткен жылмен салыстырғанда 1,6 есе көп. Қаржылай қолдау 1 531 жаңа техника сатып алуға, машиналық-технологиялық станциялар ашуға және фермерлерге жаңа технологияларды қолжетімді етуге мүмкіндік берді. Жаңартылған техника паркі жыл соңына дейін 10%-ға дейін жетеді деп күтілуде.
Егін жинау науқаны нәтижесінде 695 мың тонна дәнді дақылдар, 54 мың тонна майлы дақылдар, 1,5 млн тонна көкөніс пен картоп, 1,7 млн тонна бақша дақылдары, 5,2 млн тонна мал азықтық дақылдар және 428 мың тонна мақта жиналды. Мақта өнімділігі 1,4 есе, ал күріш 2,3 есе артты.
Су үнемдеу технологиялары енгізілген алқаптарда өнімділік айтарлықтай өсіп, суды пайдалану тиімділігі едәуір жақсарды. Тамшылатып суару мен жаңбырлатып суару әдістері ауылшаруашылық өнімдерін шығару көлемін көбейтіп қана қоймай, топырақтың құнарлылығын сақтауға және суды үнемдеуге де мүмкіндік береді.
Түркістан облысының аграрлық жетістіктері – инновациялық технологиялар, мемлекеттік қолдау және шаруалардың еңбекқорлығының нәтижесі. Алдағы жылдары жаңа технологияларды енгізу, су үнемдеу жүйесін кеңейту, техника паркін жаңарту және аграрлық сектордағы цифрландыру жобаларын іске асыру арқылы облыс өнімділік пен тұрақтылықты одан әрі арттыруға дайын.
