Түркістан облысында 2025 жыл халықаралық инвестицияларды тарту және жаңа өндіріс орындарын ашу саласында белсенді әрекеттермен басталды. Биыл облысқа тартылған тікелей шетелдік инвестициялар 543,5 млн АҚШ долларын құрап, жылдық межеден асып түсті. Бұл көрсеткіш өңірдің инвестициялық тартымдылығын арттырып, халықаралық серіктестермен экономикалық байланыстарды нығайтуға мүмкіндік береді. Түркістан облысының стратегиялық географиялық орналасуы мен халықаралық көлік дәліздеріне жақындығы, сондай-ақ индустриалды аймақтар мен арнайы экономикалық зоналардың дамуы инвесторлар үшін қосымша тартымдылық жасайды.
Ағымдағы жылы облыста іске асырылатын 58 инвестициялық жоба 8 250 тұрақты жұмыс орнын құруға бағытталған. Сонымен қатар, 111 жобалар пулы қалыптасып, толық жүзеге асырылған жағдайда өңірде 23 915 жаңа жұмыс орны ашылуы жоспарланған. Қазіргі таңда 34 жоба іске қосылып, 4 889 адам жұмыспен қамтылды, бұл өңірдегі еңбек нарығының серпінді дамып келе жатқанын, жастар мен әйелдердің еңбекке тартылуына жаңа мүмкіндіктер туындататынын көрсетеді.
Облыс әкімінің тапсырмасымен барлық инвестициялық жобаларды бақылау және сүйемелдеу жұмыстары жүйелі түрде жүргізілуде. Индустриалды аймақтар мен арнайы экономикалық аймақтарда инвесторларға салықтық және кедендік жеңілдіктер, дайын инфрақұрылым, логистикалық қолдау және мемлекеттік әкімшілікпен біріктірілген кеңес беру қызметтері ұсынылады. Мұндай қолдау жаңа өндіріс орындарын ашуға, заманауи технологияларды енгізуге және экспортқа бағытталған өнім өндірісін арттыруға мүмкіндік береді.
Мысалы, Сарыағаш ауданында «Сарыағаш құс» ЖШС 96 мың бас құсты өсіріп, 50 мың басқа арналған фабрика құрылысын іске қосты. Бұл кәсіпорын жергілікті тұрғындарға жаңа жұмыс орындарын ұсына отырып, ауыл шаруашылығы саласының дамуына үлес қосады. Индустриалды аймақтағы «Альбарака 077» ЖШС өсімдік майын өндіру цехы 20 тұрақты жұмыс орнын ашып, өңірдің экономикалық әлеуетін арттырды.
Түркістан облысы инвестициялық жобаларды тұрақты сүйемелдеп, олардың жүзеге асырылуын бақылауда ұстауды мақсат етеді. 2025–2028 жылдарға арналған жоспарлар жаңа өндіріс орындарын ашу, заманауи технологияларды енгізу, экспортқа бағытталған өнім өндірісін кеңейту және инвестициялық климатты одан әрі жақсартуға бағытталған.
Облыс инвестициялық серпін мен өндірістік дамудың үйлесімі арқылы Қазақстандағы жетекші индустриалды-инвестициялық орталыққа айналуға ұмтылып отыр. Мұндай даму ұзақ мерзімді экономикалық өсім мен әлеуметтік тұрақтылықты қамтамасыз етіп, тұрғындардың әл-ауқатын арттыруға мүмкіндік береді.
