Арыс қаласында дәстүрлі «Алтын күз – 2025» мерекесі ұйымдастырылып, ауыл шаруашылығы өнімдерінің жәрмеңкесі өтті. Шараға қала әкімі Қайсар Маңқараев арнайы қатысып, диқандар мен малшылардың жыл бойғы еңбегінің нәтижесімен танысты.
Жәрмеңкеге қалаға қарасты барлық ауылдық округтерден келген шаруалар мен жеке кәсіпкерлер қатысып, өз өнімдерін көпшілікке ұсынды. Сауда қатарында картоп, сәбіз, пияз, қырыққабат, бақша өнімдері, алма, жүзім, қауын-қарбыз, сондай-ақ ет, қымыран, дәнді дақылдар сияқты 40-тан астам өнім түрі қойылып, нарықтағы бағадан арзан сатылды. Жалпы, жәрмеңке барысында шамамен 5 тонна бақша өнімдері, 2,5 тонна жеміс-жидек және 1,2 тонна ет өнімдері сатылды.
Аталған шараның негізгі мақсаты – жергілікті өндірушілердің өнімін халыққа жеткізу, ауыл шаруашылығы саласында еңбек ететін азаматтардың еңбегін дәріптеу және тұрғындарға сапалы, таза өнім ұсыну. Жәрмеңке барысында 1 200-ден астам қала тұрғыны өнім сатып алып, ауыл шаруашылығы өнімдеріне деген сұранысты арттырды.
Мерекелік іс-шара аясында қаладағы Мәдениет үйінде ауыл шаруашылығы саласының еңбеккерлеріне арналған салтанатты шара өтті. Жиында салада ерекше еңбек сіңірген бірқатар азаматтарға «Ауыл шаруашылығы саласының үздігі» төсбелгілері, Алғыс хаттар мен бағалы сыйлықтар табыс етілді. Сонымен қатар, 30-дан астам жас шаруалар мен фермерлер марапатталды.
Шара барысында қала әкімдігі мен ауыл шаруашылығы бөлімінің өкілдері шаруаларға жаңа технологиялар мен өнімділікті арттыру жолдарына арналған консультациялар өткізді. Қатысушыларға тыңайтқыштар, суару жүйелері, заманауи құрал-жабдықтар мен агротехникалық кеңестер ұсынылды. Сонымен қатар, жәрмеңке алаңында ауыл шаруашылығы бойынша шағын көрмелер мен демонстрациялар өткізілді.
▪️Мерекенің мәдени бағдарламасы да ерекше қызығушылық тудырды. Арыс қаласы өнерпаздарының халық әндері, сазды және заманауи музыкалық орындаулары көрермендердің көңілін көтеріп, шараға ерекше мерекелік атмосфера сыйлады.
▪️Қала әкімінің айтуынша, «Алтын күз – 2025» мерекесі – жергілікті ауыл шаруашылығының дамуына серпін беретін, тұрғындар мен диқандар арасындағы байланысты нығайтатын маңызды дәстүрлі іс-шара болып отыр. Бұл бастамалар аудан мен қаладағы экономикалық белсенділікті арттырып, ауыл шаруашылығы саласына жастардың қызығушылығын оятады. Сонымен қатар, жәрмеңке тұрғындарға сапалы өнімге қол жеткізуге, фермерлерге өз өнімін нарыққа шығару мүмкіндігін беріп, ауыл шаруашылығының тұрақты дамуына ықпал етеді.
