М. Әуезов атындағы Оңтүстік Қазақстан университеті мен «ВИЗиТ алкогольсіз сусындар зауыты» ЖШС арасындағы ынтымақтастық әр жыл сайын нығая түсуде. Бұл бірлескен жұмыс жастарды қолдау, білім беру саласының дамуына серпін беру және әлеуметтік маңызы бар жобаларды жүзеге асыру бағытында маңызды нәтижелер береді. Соның бірі – 2025-2026 оқу жылында «ВИЗиТ» зауыты университеттің төрт талантты студентіне оқу грантын ұсынуы болды.
Бұл бастама екі ұйым арасындағы экономикалық және әлеуметтік жауапкершілік саласындағы ынтымақтастық меморандумына негізделген. Құжатта «Экономика» және «Маркетинг» мамандықтарының студенттері үшін бір жылдық оқу ақысын төлеу, оқу тәжірибесін зауытта өткізу, сондай-ақ болашақта жұмысқа орналасу мүмкіндігі қарастырылған. Меморандумның басты мақсаты – студенттердің кәсіби дайындығын жетілдіру және оларды еңбек нарығына дайындау.
Грант иегерлерін анықтау үшін университет пен өндіріс мекемесінің мамандарынан тұратын арнайы комиссия құрылды. Бұл комиссия студенттердің оқу жетістіктері, еңбекке деген ынтасы және жобаларға қатысу белсенділігі сияқты бірнеше критерийлер бойынша сараптама жүргізді. Комиссия жұмысы екі кезеңнен тұрды, бұл әділ әрі ашық іріктеуді қамтамасыз етті.
Сараптама нәтижесінде ЭФ-22-3к тобының студенттері Ақбата Есен мен Нұрсұлтан Дүйсенбай, ЭФ-22-1р тобының студенті Эльвина Кадыргулова және ЭФ-22-1к2 тобының студенті Бақжан Абдыкадыр «ВИЗиТ» зауытының оқу грантына ие болды. Оларға зауыт тарапынан бір жылдық оқу ақысын төлеу қарастырылған, бұл студенттердің білім алудағы қаржылық жүктемесін айтарлықтай жеңілдетеді.
Бұл жоба білім беру мен өндіріс арасындағы өзара тиімді ынтымақтастықтың жарқын мысалы. Университет студенттерінің өндірістік практикасы зауытта өтуі білім мен ғылым саласындағы теориялық білімдерін тәжірибелік дағдылармен ұштастыруға мүмкіндік береді. Осы арқылы студенттер кәсіпорынның нақты қажеттіліктерін түсініп, кәсіби деңгейін арттырады.
Сонымен қатар, оқу тәжірибесі мен ғылыми жобаларда бірлескен жұмыс нәтижесінде студенттер өндірістік процестерді тереңірек зерттеп, инновациялық шешімдер ұсынуға үйренеді. Бұл білім мен ғылымның интеграциясы кәсіпкерлік қабілеттерін дамытып, жастардың бәсекеге қабілеттілігін арттырады.
Университет пен «ВИЗиТ» зауытының бірлесе ұйымдастыруымен жүзеге асырылып жатқан бұл гранттық бағдарлама – жастарды қолдаудың, олардың білім мен ғылым саласындағы әлеуетін толық ашудың тиімді жолы. Сонымен бірге, бұл бастама өңірдің әлеуметтік-экономикалық дамуына да ықпал етеді, өйткені ол жас мамандардың сапалы кәсіби дайындығын қамтамасыз етеді.
Студенттер үшін оқу грантын алу – үлкен мотивация көзі әрі болашақта табысты маман болуға қадам. Олар өздерінің білім мен ғылымдағы жетістіктерін әрі қарай жетілдіріп, өндіріс пен инновация саласында жаңа белестерге жетуге мүмкіндік алады.
Жалпы алғанда, «ВИЗиТ» зауытының білім гранты – білім беру жүйесі мен өндіріс арасындағы тығыз байланысты нығайтып, жастарды қолдаудың тиімді тетігі. Бұл тәжірибе еліміздегі басқа жоғары оқу орындары мен кәсіпорындар үшін үлгі болары сөзсіз.
