Шымкент қаласы білім басқармасы басшысының міндетін уақытша атқарушы Қуаныш Ысқақов тұрғындармен ашық диалог орнату мақсатында азаматтарды жеке мәселелері бойынша қоғамдық қабылдау өткізді. Қабылдауға 10-ға жуық қала тұрғыны келіп, білім саласына қатысты түрлі мәселелерді ортаға салды. Қоғамдық қабылдау – тұрғындардың өзекті проблемаларын тікелей салалық басшылыққа жеткізуге мүмкіндік беретін тиімді алаң екені тағы бір мәрте дәлелденді.
Келген азаматтар тарапынан көтерілген негізгі мәселелердің қатарында мектепке қосымша ғимарат тұрғызу, спорт зал салу, балабақшаны жөндеу, сондай-ақ зейнет жасындағы педагогтың еңбек келісімшартын ұзарту сынды нақты ұсыныстар болды. Бұл сұрақтардың барлығы да тұрғындардың күнделікті өмірі мен балалардың сапалы білім алуына тікелей әсер ететін маңызды тақырыптар болып табылады.
Қуаныш Ғалымжанұлы әрбір тұрғынның өтінішін жеке-жеке тыңдап, түсіністікпен қарап, мәселелердің мән-жайына жіті назар аударды. Азаматтар көтерген мәселелер бойынша заң аясында қандай шешімдер қабылданатыны туралы нақты ақпарат беріп, тұрғындардың уәждері ескерусіз қалмайтынын айтты. Оның айтуынша, азаматтардың өтініштері мен шағымдары – білім саласындағы кемшіліктерді түзетуге бағытталған кері байланыс құралы.
Қоғамдық қабылдауда көтерілген мәселелер бойынша нақты тапсырмалар жауапты сала мамандарына жүктеліп, олардың орындалу барысы білім басқармасының тікелей бақылауына алынатыны айтылды. Мәселен, спорт залы немесе қосымша ғимарат салу секілді инфрақұрылымдық ұсыныстар қаланың даму жоспары мен бюджетіне сәйкес қарастырылатыны жеткізілді. Ал балабақшаларды жөндеу мәселесі бойынша техникалық жағдайлар зерттеліп, кезең-кезеңімен шешу жолдары қарастырылатын болды.
Зейнет жасындағы педагог қызметкерлердің еңбек қатынастарын ұзарту мәселесіне де арнайы тоқталған басқарма басшысы, бұл сұрақтар еңбек заңнамасына сай шешілетінін, әрбір жағдай жеке қаралатынын және білікті мамандардың білім саласында жұмыс істеуіне ешқандай кедергі жасалмайтынын атап өтті.
Қуаныш Ысқақов тұрғындармен мұндай ашық кездесулердің алдағы уақытта да тұрақты түрде өткізілетінін, бұл қоғамдық сенімді нығайтудың, сондай-ақ білім саласындағы өзекті мәселелерді нақты әрі уақтылы шешудің бір жолы екенін айтты. Оның сөзінше, білім беру саласын дамыту тек мемлекеттік органдардың емес, бүкіл қоғамның ортақ жауапкершілігі болып табылады.
Қоғамдық қабылдау – тұрғындар үшін өз ойы мен ұсынысын жеткізетін тиімді құрал ғана емес, сонымен қатар жергілікті билік пен халық арасындағы сенімді байланысты нығайту жолы. Шымкент қаласы білім басқармасы бұл бағыттағы жұмыстарды одан әрі жалғастырып, халықтың сұранысы мен ұсыныстарына ашық болу қағидатын ұстануда.
Осы қабылдаудан кейін әрбір өтініштің орындалу мерзімі мен барысы жіті қадағаланатын болады. Басқарма басшысы қоғамдық бақылау механизмін де күшейтіп, тұрғындармен байланыс сапасын арттыруға бағытталған бастамаларды жалғастыра беретінін жеткізді. Сонымен қатар, білім саласындағы кез келген мәселе бойынша азаматтар басқармаға еркін жүгіне алатынын, бұл олардың заңды құқығы екенін де еске салды.
