Қазіргі білім беру жүйесінде мектеп жасына дейінгі балалардың экологиялық мәдениетін қалыптастыру – стратегиялық маңызды бағыттардың бірі. Табиғатқа ұқыпты көзқарас, экологиялық сауаттылық және жауапкершілік – тұлғаның жан-жақты дамуына ықпал ететін негізгі факторлар қатарында. Осы орайда, Шымкент қаласы білім басқармасына қарасты №46 «Ақбөпе» бөбекжай-бақшасы» мемлекеттік коммуналдық қазыналық кәсіпорны «Жасыл балабақша» жобасын табысты жүзеге асырып келеді.
Аталған жоба – мектепке дейінгі ұйымдарда экологиялық білім мен тәрбие берудің тиімді моделі ретінде танылып отыр. Жоба мақсаты – балалардың табиғи ортаға деген сүйіспеншілігі мен жауапкершілігін қалыптастыру, экологиялық сана мен сауаттылықты ерте жастан дамыту, сондай-ақ табиғат пен адам арасындағы үйлесімді байланысты түсіндіру.
Жобаны жүзеге асыру аясында балабақша ауласында арнайы экологиялық бұрыштар ұйымдастырылған. Аула кеңістігі гүлдер мен көкөніс дақылдарын егуге бейімделіп, тәрбиешілер мен ата-аналардың қолдауымен балалар белсенді түрде көгалдандыру, күтіп-баптау, суару, бақылау және еңбек ету үдерістеріне қатысуда. Бұл тәжірибе балалардың табиғат құбылыстарын бақылау арқылы танымдық қабілеттерін дамытуға, еңбек дағдыларын қалыптастыруға және ұжымда жұмыс істеуге үйретуге мүмкіндік береді.
Балалардың күнделікті жүргізіп отырған қарапайым әрекеттері – олар үшін үлкен өмірлік сабақ. Мысалы, дән себу, өскінге су құю, оның қалай өсіп келе жатқанын бақылау – тәрбие барысында балаға табиғи заңдылықтарды тәжірибе арқылы ұғынуға көмектеседі. Мұндай іс-шаралар экологиялық тәрбие беруде тек теориялық ақпаратпен шектелмей, тәжірибеге негізделген оқытудың маңызын көрсетеді.
Сонымен қатар, жоба аясында экология тақырыбында түрлі танымдық ойындар, викториналар, шығармашылық шеберханалар, сурет байқаулары, тақырыптық көрмелер мен серуендер ұйымдастырылады. Бұл іс-шаралар балалардың қоршаған ортаға қызығушылығын арттырып, таным көкжиегін кеңейтуге ықпал етеді.
«Жасыл балабақша» жобасы тек балаларға ғана емес, педагогтер мен ата-аналарға да экологиялық мәдениетті сіңіруге мүмкіндік береді. Педагогтер экологиялық білім беру әдістемесін жетілдіріп, тәрбие жұмысына интеграциялау арқылы балалармен тиімді қарым-қатынас орнатуда. Ал ата-аналар тарапынан жобаның әлеуметтік маңызы артып, баланың үйде де табиғатты аялауға бейімделуіне қолдау көрсетіледі.
«Жасыл балабақша» жобасы – экологиялық білім беруді ерте жастан бастауға арналған тиімді педагогикалық бастама. Ол балалардың табиғатпен үйлесімді қарым-қатынас жасауына, еңбекке деген құрметін арттыруына және жауапкершілікті тұлға ретінде қалыптасуына жол ашады. Бұл жоба – мектепке дейінгі ұйымдардағы тәрбиелік жұмыстың жаңа сапалық деңгейге көтерілуіне ықпал етіп отырған маңызды тәжірибе. Шымкент қаласы білім беру ұйымдары арасында экологиялық мәдениетті дамыту бағытындағы осындай жобалар алдағы уақытта да жалғасын табатынына сенім мол.
