2025 жылғы жазғы кезеңде Шымкент қаласының әкімдігі балалардың демалысын, сауықтырылуын және жұмыспен қамтылуын жоғары деңгейде ұйымдастыру мақсатында кешенді және жүйелі іс-шаралар топтамасын жүзеге асыруда. Бұл бағытта балалар мен жасөспірімдердің жазғы мезгілін қауіпсіз әрі мазмұнды өткізуіне жағдай жасау басты назарда. Осыған орай, өңіраралық штаб құрылып, арнайы іс-шаралар жоспары бекітілді.
Жалпы қамту көрсеткіші:
Қаладағы жалпы орта білім беретін мектептерде оқитын 255 118 оқушының 241 852-сі, яғни 94,8%-ы түрлі бағыттағы жазғы демалыс және бос уақытты тиімді өткізу бағдарламаларымен қамтылатын болады. Бұл – балалардың жазғы уақытта толыққанды дамуына, шығармашылық әлеуетін ашуға, салауатты өмір салтын ұстануына мүмкіндік береді.
Қала сыртындағы сауықтыру лагерьлері:
Жергілікті бюджет есебінен 9 693 бала қала сыртындағы сауықтыру және даму лагерьлерінде демалады. Бұл мақсатта 759,4 миллион теңге қаржы бөлініп отыр. Оның ішінде:
- Балалар үйінен – 135 бала (80 күнге, бір балаға – 7 500 теңге),
- Дарынды мектеп оқушылары – 160 бала (10 күнге, бір балаға – 75 000 теңге),
- Жекеменшік лагерьлерде – 8 198 бала (10 күнге, бір балаға – 75 000 теңге),
- Мемлекеттік «Ақсу» лагерінде – 1 200 бала (10 күнге, бір балаға – 43 248 теңге).
Бұл шаралар балалардың демалуын ғана емес, олардың әлеуметтік дағдыларын дамыту, табиғат аясында уақыт өткізу, танымдық және спорттық белсенділіктерге қатысуын да көздейді.
Ата-аналар мен демеушілердің қолдауымен:
Бюджеттен тыс қаражат көздері есебінен де балалардың жазғы демалысы ұйымдастырылуда. Атап айтқанда, 9 463 бала ата-аналар мен демеушілердің қолдауымен, ал 162 бала кәсіподақ ұйымдарының көмегімен қала сыртындағы лагерьлерде тынығады.
Мектеп жанындағы және мектептен тыс жазғы алаңдар:
Жаз айларында қала мектептерінде ұйымдастырылатын алаңдарда 179 425 оқушы бос уақытын тиімді өткізуге мүмкіндік алады. Бұл алаңдарда спорттық жарыстар, шығармашылық үйірмелер, экскурсиялар және түрлі мәдени шаралар өтеді.
Мақсат – әрбір баланың қауіпсіз, мазмұнды және белсенді жазғы демалысын қамтамасыз ету!
Шымкент қаласы әкімдігі балалардың жазғы уақытын пайдалы өткізуін маңызды әлеуметтік міндеттердің бірі ретінде қарастырады. Әрбір баланың жан-жақты дамуы мен денсаулығын нығайту – басты басымдықтардың қатарында. Бұл бағыттағы жұмыстар алдағы уақытта да өз жалғасын табады.
