Қазақстан Республикасының Бас прокуратурасы жанындағы Құқық қорғау органдары академиясын биылғы жылы 100-ге жуық түлек сәтті аяқтады. Заң мен тәртіпті басты қағида еткен жас мамандар енді еліміздің түрлі аймақтарындағы құқық қорғау саласында қызметке кіріседі. Бұл туралы ҚР Бас прокуратурасы ресми түрде мәлімдеді.
Академияда білім алған курсанттар кәсіби даярлықтың жоғары деңгейінен өтті. Олар тек теориялық біліммен шектеліп қалмай, тәжірибелік машықтану мен психологиялық дайындық бағытында да кешенді дайындықтан өтті. Академияда қалыптасқан оқу-тәрбиелік жүйе курсанттарды тәртіпке, сабырлылыққа, шешім қабылдау қабілетіне, құқық пен адамгершілік қағидаларын ұстануға баулиды.
Бүгінде салада кадрларды іріктеу мен қабылдаудың жаңа форматы енгізілуде. Соның бірі – «OPEN ACADEMY» атты заманауи цифрлық платформа. Бұл жоба кадр даярлау процесін толығымен автоматтандыруға бағытталған. Платформа мемлекеттік мекемелердің ақпараттық жүйелерімен интеграцияланып, үміткерлердің құжат тапсыруынан бастап еңбек шартына қол қоюға дейінгі барлық кезеңін онлайн форматта жүзеге асырады. Осы арқылы іріктеу ашық, әділ әрі тиімді өтеді деп күтілуде.
ҚР Бас прокуратурасының Кадрлық жұмыс департаментінің бастығы Аида Әнуардың айтуынша, жаңа платформа үміткерлерге эссе жазу, психологиялық және социологиялық тесттерден өту мүмкіндігін қашықтан береді. Тек әскери-дәрігерлік комиссиядан өту мен полиграфиялық тексеру офлайн форматта жүргізіледі. Бұл үміткерлердің уақытын үнемдеп, үдерістің ашықтығын қамтамасыз етеді.
Айта кету керек, соңғы 4 жыл ішінде Құқық қорғау органдары академиясынан мыңнан астам жас маман түлеп ұшқан. Жыл сайын еліміздегі құқық қорғау саласына қажетті кадрлар сұранысқа сай жоспарланып, мақсатты түрде оқытылады. Бұл – құқық қорғау жүйесінде кәсіби білікті мамандарды қалыптастырудың нақты тетігі.
Академияны тәмамдаған түлектер болашақта полиция, прокуратура, тергеу, қылмыстық атқару жүйесі және басқа да құқық қорғау құрылымдарында қызмет етіп, қоғамдық қауіпсіздікті сақтау мен құқықтық тәртіпті қамтамасыз ету жолында еңбек етпек.
Осылайша, құқық қорғау саласына жаңа леп, тың серпін әкелетін кәсіби мамандардың қатары толықты. Мемлекет пен қоғам үшін маңызды салада еңбек ететін болашақ офицерлерге сәттілік пен адал қызмет тіленеді.
