2025 жылдың 26–27 ақпаны күндері Шымкент университетінде Өзбекстан Республикасындағы жетекші оқу орындарының бірі — Низами атындағы Ташкент мемлекеттік педагогикалық университетінің (ТМПУ) ресми делегациясы келіп, екіжақты кездесу өткізді. Шараның басты мақсаты — «Бастауыш оқытудың педагогикасы мен әдістемесі» және «Музыкалық білім» білім беру бағдарламалары бойынша қосдипломды білім беру бағдарламасын іске асыру болды.
Кездесуге Шымкент университетінің ректоры, проректорлары, академиялық бөлім басшылары мен профессор-оқытушылар құрамы, сондай-ақ ТМПУ-дың проректорлары, факультет декандары және бағдарлама үйлестірушілері қатысты.
Қосдипломды бағдарлама – бұл білім алушыларға бірден екі жоғары оқу орнынан диплом алуына мүмкіндік беретін заманауи білім беру моделі.
Екі университет арасындағы әріптестік Қазақстан мен Өзбекстан арасындағы мәдени-ғылыми байланысты нығайтуға үлес қосып, түркітілдес халықтар арасындағы ынтымақтастықты жаңа деңгейге көтереді.
Ынтымақтастық аясындағы негізгі бағыттар:
- Білім беру бағдарламаларын үйлестіру және интеграциялау – қос оқу орны оқу жоспарларын үндестіріп, ортақ оқу-әдістемелік кешендер мен пән модульдерін даярлайды;
- Оқытушылар алмасуы – профессорлық-оқытушылық құрам арасындағы тәжірибе алмасу, бірлескен ғылыми-зерттеу жобаларын жүргізу;
- Білім алушылардың академиялық ұтқырлығы – екі университет арасында студенттерді өзара оқыту, тағылымдамадан өткізу және практика ұйымдастыру;
Екіжақты кездесудің қорытындысы бойынша Шымкент университеті мен Низами атындағы ТМПУ арасында қосдипломды білім беру бағдарламасын іске асыру жөніндегі келісімге қол қойылды.
Шымкент университетінің ректоры бұл бастаманың стратегиялық маңызын ерекше атап өтті:
«Қосдипломды бағдарлама — болашақ мамандарға халықаралық деңгейде білім алуға, жаңа көзқарас қалыптастыруға және еңбек нарығында бәсекеге қабілетті болуға жол ашады. Бұл — біздің білім беру саласын халықаралық стандарттарға сай дамытудағы нақты қадамымыз», — деді ол.
Бұл маңызды кездесу қос елдің білім беру жүйесінің интеграциялануына, шекаралас мемлекеттердің зияткерлік әлеуетін арттыруға және студенттердің кәсіби дамуына жол ашады. Қосдипломды бағдарламаның іске қосылуы — екіжақты достық қарым-қатынастың нәтижелі жемісі әрі өңірлік білім беру кеңістігіндегі тарихи оқиға болып саналады.
