Қазақстанның еңбек сіңірген қайраткері, халықаралық «Алаш» және «Түркі әлеміне қызмет» сыйлықтарының лауреаты, жазушы публицист Мархабат Байғұттың мерейлі 75 жасқа толуына орай, 2020 жылғы 17 сәуір және 26 мамыр аралығында «Махаббат мақам Мархабат» республикалық жас қаламгерлердің шығармашылық байқауы өткізілді. Республикалық жас қаламгерлердің шығармашылық байқауына республикамыздың басқа да облыстарынан қатысушылар ниет білдіріп, өтініш білдірген.
Жалпы байқауға 87 жас қаламгерлер қатысып, топтан жарып шыққан үздіктер мен жүйріктер анықталды. Көркем шығарма бағыты бойынша 1-орынды Түркістан қаласынан Әмәлият Арқалық жеңіп алды, 2-орынға Отырар ауданынан Аяулым Жақсыбек ие болса, 3-орынды Қазығұрт аудынан Жамал Жүрсінбек қанағат тұтты. Ал, көркем өлең бағыты бойынша 1-орынды Түркістан қаласынан топ жарған Дәурен Тлеухан иемденсе, 2-орынды Түркістан қаласынан Еламан Төлеутай, 3-орынды Шығыс Қазақстан облысынан Рысгүл Досжан алды. Сондай-ақ, эссе жазу бағыты бойынша 1-орын Шымкент қаласынан Анарбай Жамал; 2-орын Шымкент қаласынан Ерболат Айнабеков; 3-орын Ақтөбе облысынан Дархан Мендолинға бұйырды.
Байқаудың қорытынды нәтижесін арнайы құрылған әділ қазылар алқасы қазылық жасады. Әділқазылар алқасының құрамында Қожа Ахмет Ясауи атындағы Халықаралық қазақ-түрік университетінің профессоры, филология ғылымдарының докторы Сейдулла Садықов, Халықаралық «Шабыт» фестивалінің лауреаты, ақын Әлібек Шегебай, жас ақын Мұқағали Кенжетай және Түркістан облысы қоғамдық даму басқармасының «Жастар ресурстық орталығы» КММ-і басшысы Амалбек Өміртай бар.
Жастар ресурстық орталығының басшысы Амалбек Өміртай барлық қатысушы жастарға алғыс білдіріп және жеңімпаздарды құттықтап, шығармашылық табыс тіледі.
Байқау жеңімпаздары облыстық «Жастар ресурстық орталығының» арнайы сыйлықтарымен және алғыс хаттарымен онлайн марапатталды.
Түркістан облысының Өңірлік коммуникациялар қызметі
