Еліміздің демографиялық өсіміне үлес қосып жүрген бір топ көпбалалы аналар Қазақстан Республикасының Президенті Қасым-Жомарт Тоқаевтың Жарлығымен «Күміс алқамен» марапатталды. Аудан әкімі Қайрат Жолдыбайұлы апта басында осынау аналарды арнайы қабылдап, марапаттарымен құттықтады.
–Сіздер еліміздегі халық санының артуына айрықша үлестеріңізді қосудасыздар. Сондықтан да сіздер Қасым-Жомарт Кемелұлының Жарлығымен «Күміс алқамен» марапатталып отырсыздар. Қазіргі таңда көпбалалы аналарға мемлекет тарапынан көптеген қамқорлықтар жасалынып жатыр. Сонымен бірге, облыс әкімі Өмірзақ Шөкеевтің тапсырмасына сәйкес «Қамқорлық» бағдарламасы жасалынып, ол қолға алынуда. Марапаттарыңыз құтты болсын, отбасыларыңызға амандық, бақ-береке тілеймін! – деді Қайрат Жолдыбайұлы.
Мұнан кейін аудан әкімі көпбалалы Ләззат Баубекова, Әйгерім Керімбекова, Индира Мәкиева, Роза Нышанова, Жұлдыз Садықова, Ақмарал Тәжімұратова, Айсұлу Өмірзақова, Айгүл Халбекова сынды аналарға «Күміс алқасы» мен гүл шоқтарын салтанатты түрде табыс етті.
