Келес ауданының әкімі Ақментай Есбаев 1 мамыр – Қазақстан халқының бірлігі күнімен әлеуметтік желі арқылы құттықтады.
Құрметті келестіктер!
Сіздерді 1 мамыр – Қазақстан халықтарының бірлігі күні мерекесімен шын жүректен құттықтаймын!
Халық бірлігі – қасиетті сөз. Халық бірлігі болған жерде несібеміз бен құт-берекеміз ортақ. Сондықтан 1 мамыр мерекесінің басты құндылығы осы.
Қадірменді ағайын!
Ел басына күн туған қилы замандарда да халқымызды ұлт ретінде сақтап қалған осы ынтымағымыз бен бір-бірімізге деген бауырмалдығымыз. Жаугершілік заманда басы ауған жаққа көшіп жүріп те берекесі мен қазанын ортайтпаған қасиетті қанағатшыл ағаш бесік пен жер бесік арасындағы біреуге ұзақ, біреуге шолақ өмір жолдарында өзін өзекке теппей, өзгенің қызылына қызықпай, ұлтымыз терең кемеңгерлікпен, ешқашанда тарылмаған кеңдігімен құшағын кеңейтіп келеді.
Біз осындай дархан пейіліміздің арқасында, бүкіл әлемге ынтымағы жарасқан, халқының пейілі кең ел ретінде танылдық. Бізді шет мемлекеттер осылай елестеді.
Ардақты әлеумет!
Өздеріңіз білетіндей, қазіргі шақта төрткүл дүниені шарпыған қатерлі індет Елімізді де айналып өтпеді. Мемлкет басшымыздың дер кезінде қабылдаған шешімі індеттің асқынып кетуінің алдын алуда орасан рөл атқарды. Ендігі кезекте санитарлық тазалық пен тәртіпті сақтай отырып, өзімізді оқшауласақ бұл күндер де артта қаларына сенемін!
Қадірменді жерлестер!
Бейбітшілік пен татулықтың арқасында бізді болашақта бұдан да жарқын, баянды күндер күтіп тұрғанына сендіргім келеді.
Бір шаңырақтың астындағы халқымыздың достығы мен өзара түсіністігі одан әрі жалғасып, еліміздегі ұлтаралық татулық әрдайым берік болып, қашан да ынтымақ, бірлік мәңгі жасай берсін!
Осы орайда баршаңызды тағы да бүгінгі мерекемен шын жүректен құттықтай отырып, жалпы келестіктерге зор денсаулық, отбасыларына құт-береке, бақыт тілеймін.
Бірлігіміз бекем болсын ардақты ағайын!
Құрметпен Келес ауданының әкімі Ақментай Есбаев – делінген фейсбуктегі жазбасында.
