ҚР Президенті Қасым-Жомарт Тоқаев коронавирус пандемиясына қатысты төтенше жағдай бойынша тұрақтылықты қамтамасыз ету шаралары туралы Жарлығына сәйкес, аудан әкімі Бауыржан Бақытұлының төрағалығымен жедел штаб жиыны өтті. Жиын барысында жарлықтағы көрсетілген негізгі шараларды сақтау бойынша тиісті тапсырмалар берілді.
Сонымен қатар, аудандағы халық көп шоғырланатын орталықтарды залалсыздандыру мақсатында Төлеби ауданының сауда орындарында, автобекеттерінде күннен-күнге өршіп отырған коронавирус індетінің алдын алу шаралары жүргізілуде. Дәрілеу (дезинфекциялау) жұмыстары таңертең және кешкі уақытта кісі аяғы жиналмаған кезде екі мәрте атқарылуда.
Алдын алу шараларымен қатар қоғамдық орындарда ақпараттық түсіндірме парақшалары таратылып, ілінуде.
Бүгінгі таңда аса қажеттілікті тудырмайтын Ленгір қаласындағы «Тау жұлдызы» сауда орталығы төтенше жағдай жарияланған уақытқа, яғни 1 айға жұмысын тоқтатады.
Құрметті аудан тұрғындары! Жаһанды жайлаған коронавирус індетіне өзіміздің ішкі иммунитетімізді күшейту арқылы ғана қарсы тұра аламыз. Сондықтан, дүрлігуге жол бермей, барынша сақтық шараларын сақтайық!
Төлеби ауданы әкімінің баспасөз қызметі
