Өзіңде барды өзгемен бөлісу – адамдық қасиеттің ұлысы. Шымкенттік кәсіпкер Саухан Аташбекұлы, жомарттықпен жан семірткен көпке үлгі азамат. Адал еңбегімен кәсіптің көзін, еңбектің ебін тапқан ел ағасы 250 отбасыға азық – түлік пен қаржылай қолдау көрсетіп, зекет парызын орындады. Осылайша маңайындағы мұқтаж жандардың алғысын арқалады, деп жазады «On’tu’stik» телеарнасының тілшісі Қ.Жүнісбековтің материалына сілтеме жасаған AzatMedia.
Дәстүрден жаңылмай көпке көмек қолын созған демеуші, бұл жылы да игі амалын жүзеге асырды. Алдымен Шымкенттегі «Жаңа талап» елді мекенінде әлеуеті әлжуаз топқа әлеуметтік көмек көрсетті. Түркістан қаласынан да тұрмысы төмен отбасыларды тапты. Қолдау көрсетіп, азық – түлік сепбетін таратты. Енді өзі жамағатпен сапқа тұрып, құлшылығын қалдырмаған «Айтбай ата» мешітінде жергілікті тұрғындарға қолдау білдіріп отыр. Ас-ауқатқа қажетті деген күнбағыс майы мен ұнын, шәй мен қантын, макороны мен күрішін қайырымдылық шарасында тегін тарту етті. Сондай-ақ, өз цехында өндіретін кондитерлік тәттілері мен әр отбасыға бір кілемін де ұмыт қалдырмады.
Саухан Аташбекұлы – кәсіпкер: Биыл 250-дей отбасыға көмектестік. Түркістан қаласында да, осында да мұқтаж жандардың алғысын алдық.
Зекеттің жария түрде жасалу жолында да Алла мол сауаптан жазады. Тек ниетіңіз өзгелер өнеге алсын, қайырымдылықтан қайыр көрсін болғанда ғана. Бұл мешіт имамының пікірі. Алла үйінің демеушісі атанып кеткен, Саухан Аташбекұлы мешіттің бұдан өзге де көптеген жиынында бас көтеріп, жомарттығын танытыпты.
Есалы Тәжібаев – «Айтбай ата» мешітінің бас имамы: Саухан ағамыз бүгін үлкен қайырымдылық жасап отыр. Бұл өте сауапты іс…
Коронавирустың салдары – карантинге әкеп соқты. Әрине бұл ең алдымен халық үшін жасалған шектеу. Алайда арамызда карантинде табысынан қағылған ағайын да бар. Соның бірі 62 жастағы Нұрбибі Тәжіқұлова. Осындай жомарт жандардың арқасында, қам көңіліміз қуанды – дейді ол.
Бүгінгінің бас кейіпкері көпті жақсылық жасауға шақырады. Қолдан келмесе өзгеге зияның тимесін дегенді ұран етеді. Арамызда жүр жақсы адам…
