Мемлекет басшысы көлік-логистика инфрақұрылымын одан әрі дамытудың маңыздылығына ерекше назар аударып, қалалар мен елді мекендерде сапалы әрі қолайлы қоғамдық көлік жүйесі қалыптасуы қажет екенін атап өткен болатын. Осы тапсырма аясында Сарыағаш ауданында қоғамдық көлік паркін жаңарту жұмыстары жүргізіліп, аудан әкімі Арман Абдуллаев жаңа автокөліктердің кілттерін салтанатты түрде табыстады.
Салтанатты рәсімге аудандық мәслихат төрағасы Рысбек Асылбекұлы, «AMANAT» партиясы аудандық филиалының төрағасы Шермат Ибрагимов, сондай-ақ сала өкілдері мен қоғамдық ұйымдардың басшылары қатысты. Рәсім барысында жаңартылған автопарктың аудан тұрғындары үшін маңыздылығы атап өтіліп, жаңа көліктердің сапалы қызмет көрсетуге бағытталатыны айтылды.
Аудан әкімі Арман Абдуллаев өз сөзінде Мемлекет басшысының халықтың өмір сүру сапасын арттыру жөніндегі тапсырмасына сәйкес, ауданда жолаушылар тасымалын жетілдіру бағытында жүйелі жұмыстар жүргізіліп жатқанын жеткізді. Оның айтуынша, қоғамдық көліктердің жаңартылуы тұрғындарға көрсетілетін қызмет сапасын арттырып, жолаушылардың уақтылы әрі қауіпсіз қатынауын қамтамасыз етеді. Сонымен қатар, автопаркті тиімді пайдалану, техникалық қауіпсіздік талаптарын қатаң сақтау және мәдениетті қызмет көрсету — жаңа көліктердің жұмыс тиімділігін арттырудың негізгі шарттары болып табылады.
Айта кетсек, қызмет көрсетуші «SAR AVTO» жауапкершілігі шектеулі серіктестігі мен Сарыағаш ауданы әкімдігінің бастамасымен «Өнеркәсіпті дамыту қорымен» келісім жасалып, қаржылық лизинг тетігі арқылы қаражат тартылды. Осы механизм арқылы 6 дана «Газель» және 2 дана «ПАЗ» маркалы автобустар сатып алынды. Жаңартылған автопарк ауданішілік және елді мекендер арасындағы көлік қатынасын айтарлықтай жақсартып, жолаушыларға қолайлы жағдай жасауға және жол қозғалысы қауіпсіздігін арттыруға мүмкіндік береді.
Жобаның іске асуы нәтижесінде тұрғындар үшін қоғамдық көліктердің қозғалысы уақтылы, тұрақты және қауіпсіз болады. Сонымен қатар, жаңартылған автопаркқа жүргізілген техникалық қызмет көрсету, жүргізушілерді арнайы оқыту және сапа бақылау жүйесі тұрғындардың сенімін арттыруға септігін тигізеді.
Алдағы уақытта Сарыағаш ауданында қоғамдық көлік желісін кеңейту, жаңа бағыттар ашу және көліктер санын арттыру жоспарлануда. Бұл шаралар аудан тұрғындарының өмір сапасын жақсартуға, ауылдық елді мекендермен байланыс орнатуға және көлік инфрақұрылымын дамытуға қосымша серпін береді.
Жалпы, жаңартылған автопарк — Сарыағаш ауданындағы көлік қызметінің сапасын арттыруға, жолаушылардың уақытын үнемдеуге және қоғамдық көлік жүйесін заман талабына сай жетілдіруге бағытталған маңызды әлеуметтік бастама болып отыр.
