Мысыр астанасы Каирде өткен жекелей әлем чемпионатында Түркістан облысының мақтанышы, каратэ-кумитеден 61 келіге дейінгі салмақ дәрежесінде ел намысын қорғаған Әсел Қанай қола медальға ие болды. Түркістандық спортшы жүлдеге таласта украиналық Олександра Шолохованы 3:2 есебімен жеңіп, Қазақстан қоржынына маңызды медаль салды. Бұл жеңіс өңір спортының жетістіктерін халықаралық деңгейде танытудың жарқын үлгісі болып отыр, сондай-ақ жас спортшылар үшін үлкен мотивацияға айналды.
Тарихи жеңіспен оралған Әсел Қанайды Түркістан халықаралық әуежайында облыстық спорт басқармасының басшысы Ғалымжан Худияров, спорт саласының өкілдері, бапкерлері, жанкүйерлері және ата-анасы ерекше ықыласпен қарсы алды. Жиналған қауым спортшыны құрметтеп, оның табандылығы мен еңбегін жоғары бағалап, жеңісімен шын жүректен құттықтады. Түркістандықтар Әселдің жетістігін өздерінің де жеңісі ретінде қабылдап, оның халықаралық аренадағы жеңісін мақтанышпен атап өтті.
Биылғы маусымды жоғары нәтижемен қорытындылаған Әсел Қанай қысқа демалыстан кейін Азия ойындарына тыңғылықты дайындықты бастайды. Оған бапкерлер командасы жан-жақты қолдау көрсетіп, халықаралық жарыстарда табысты өнер көрсетуге қажетті барлық жағдайлар қарастырылған. Спортшының күнделікті дайындықтары қатаң жоспар бойынша жүргізіліп, физикалық және тактикалық қабілеттерін жетілдіруге ерекше мән беріледі.
Айта кетейік, Әсел – Түркістан облыстық олимпиадалық емес және ұлттық спорт түрлерінен мамандандырылған жоғары спорт шеберлігі мектебінің шәкірті. Оның жетістігі жүйелі дайындық, төзімділік пен табандылықтың нәтижесі болып табылады. Сонымен қатар, Әсел өңірдегі жас спортшыларға үлгі болып, каратэ спортын насихаттау мен талантты балаларды қолдауға зор үлес қосуда.
Спортшының жетістігі тек жеке марапатпен ғана шектелмей, Түркістан облысының халықаралық спорт аренадағы беделін арттырып, ел намысын қорғаудағы маңызды рөл атқарады. Жүлдегерге арналған салтанатты қарсы алу шаралары оның еңбегі мен жетістігін бағалаудың көрінісі болып, облыстық спорт саласының дамуына қосқан үлес ретінде есте қалды.
Алдағы уақытта Әсел Қанай халықаралық жарыстарда табысты өнер көрсетіп, Қазақстанның спорттық қоржынына жаңа жетістіктер қосатынына сенім мол. Түркістандықтар жас спортшының жолын жаппай қолдап, оның жеңістері мен жетістіктеріне бірге қуанып отыр.
