Түркістан облысының делегациясы Самарқанд облысына жұмыс сапарымен барып, туризмді бірлесе дамытуға бағытталған стратегиялық келісімдер жасады. Сапар барысында Түркістан облысының әкімі Нұралхан Көшеров және Самарқанд облысының хокимі Әдиз Бобоев туризм, мәдениет, білім және инвестиция салаларында бірлескен жобаларды дамытуға Меморандумға қол қойды.
Құжат аясында екі облыс туристік бағыттарды біріктіріп, ортақ турөнімдер жасауға, туристер ағымын көбейтуге, туроператорлар мен қонақүйлерді ынтымақтастыруға және халықаралық деңгейде маркетинг жүргізуге міндеттеме алды. Сонымен қатар, туристік инфрақұрылымды жаңғырту, гид-экскурсоводтарды даярлау, қонақүй және сервистік қызметтер сапасын арттыру бағытында бірлескен іс-шаралар жүзеге асырылатын болды. Түркістандық делегация мүшелері Самарқандтағы Туризм академиясында жергілікті туроператорлармен кездесіп, тәжірибе алмасу, цифрландыру және туристік ақпараттық жүйелерді дамыту бойынша ұсыныстар талқылады.
Түркістан мен Самарқандтың ортақ тарихи және мәдени мұрасы Ұлы Жібек жолы дәуірінен бастау алады. Нұралхан Көшеров бұл байланыстарды заманауи туризмді дамытуға пайдаланып, ортақ туристік маршруттар, гастрономиялық және мәдени фестивальдер өткізу, туристік экскурсияларды біріктіру арқылы екі облыстың туристік әлеуетін арттыруға шақырды. Биыл ашылған тікелей әуе рейсі екі аймақ арасындағы саяхаттарды едәуір жеңілдетті, бұл туристер ағымын арттыруға және туризм саласындағы экономикалық серпінді күшейтуге мүмкіндік берді.
Статистикалық мәліметтер бойынша, 2025 жылдың 9 айында Түркістан облысына 830 мың турист келген, бұл өткен жылмен салыстырғанда 13%-ға жоғары. Оның ішінде Өзбекстаннан келетін туристер саны 26 мыңға жетіп, екі ел арасындағы туристік байланысты нығайтуда маңызды рөл атқарды. Туристердің көп бөлігі тарихи және мәдени нысандарға, киелі орындарға, сондай-ақ жаңа инфрақұрылымдық кешендер мен қонақүйлерге тартылды.
Сапар қорытындысы бойынша тараптар өңіраралық байланыстарды дамыту, туристік инфрақұрылымды жақсарту, ортақ мәдени-тарихи кеңістікті қалыптастыру және халықаралық деңгейде екі облыстың туристік әлеуетін ілгерілету бойынша нақты іс-қимыл жоспарларын әзірлеуге келісті.
Бұл ынтымақтастық екі облыстың туризмін жаңа деңгейге көтеріп, экономикалық өсім мен мәдени даму, жұмыс орындарын көбейту және туристік брендтің халықаралық танымалдылығын арттыруға серпін береді. Түркістан мен Самарқанд өңірлерінің ортақ жобалары тек туристерді тартумен шектелмей, өңіраралық ынтымақтастық пен мәдени байланыстарды одан әрі нығайтуға бағытталған стратегиялық қадам болып отыр.
