Ордабасы ауданында жаңартылатын энергия көздерін дамыту бағытында ауқымды жоба қолға алынды. Атап айтқанда, Қытай Халық Республикасының инвесторы Чен Жянфенг бастаған «ASIA ENERGY Co» ЖШС тарапынан қуаттылығы 50 МВт болатын күн электр станциясын салу жоспарланып отыр. Жобаның мақсаты – аудан мен өңірдің энергетикалық тәуелсіздігін арттыру, экологиялық таза энергия өндіру және инфрақұрылымдық әлеуетті нығайту.
Жобаны іске асыруға байланысты аудан әкімі Азат Оралбаев пен инвестор арасында екіжақты ынтымақтастық туралы меморандумға қол қойылды. Құжат тараптардың міндеттері мен жауапкершіліктерін, жобаны жүзеге асыру үшін көрсетілетін қолдауларды, инфрақұрылымды дамыту мәселелерін және жұмыс барысын кезең-кезеңімен реттейді. Меморандум аясында инвестор аудандағы жер учаскелерін пайдалану, электр желілеріне қосылу, жол және инженерлік инфрақұрылымды тарту сияқты ұйымдастырушылық шараларды жүзеге асыруға мүмкіндік алады.
Алдағы уақытта жобаны іске асыруға техникалық-экономикалық негіздеме дайындалып, инженерлік іздестіру жұмыстары жүргізілмек. Сонымен қатар, станцияны салу аумағында жерді дайындау, құрылыс материалдарын жеткізу, жол және электр желілерін жүргізу жұмыстары кезең-кезеңімен атқарылмақ. Жобаны іске асыру барысында жергілікті мамандарды тарту, жаңа жұмыс орындарын ашу және кәсіби дайындыққа бағытталған тренингтер ұйымдастыру жоспарлануда.
Күн электр станциясының құрылысы ауданның энергетикалық әлеуетін едәуір арттырып, жаңартылатын энергия көздерін дамытуға тың серпін береді. Станция іске қосылғанда жылына бірнеше мың мегаватт энергия өндіріледі, бұл өңірдегі тұрғын үй мен өндірістік нысандардың электр қуатымен үздіксіз қамтамасыз етілуіне, сондай-ақ ауыл шаруашылығы мен кәсіпкерлік саласының тұрақты дамуына мүмкіндік береді.
Жобаның әлеуметтік-экономикалық мәні де зор: инвестициялық жобаны жүзеге асыру барысында 50-ден астам тұрақты жұмыс орны ашылады, жергілікті экономикаға қосымша қаржы түседі, ауданның салықтық әлеуеті күшейеді. Сонымен қатар, станциядан өндірілетін энергия экологиялық таза болып, атмосфераға зиянды газдардың шығарындыларын азайтуға үлес қосады.
Аудан әкімдігі тарапынан жобаны уақытылы іске асыруға толық қолдау көрсетіліп, құрылыс сапасы мен экологиялық талаптардың сақталуы қатаң бақылауға алынатын болады. Сонымен қатар, болашақта станция маңайында қызмет көрсету, техникалық қолдау және оқыту орталықтары ашылып, жобаның ұзақ мерзімді тұрақтылығы қамтамасыз етілетін болады.
Осылайша, Ордабасы ауданындағы 50 МВт қуаттылықтағы күн электр станциясы – жаңартылатын энергия көздерін дамыту, экологиялық ахуалды жақсарту және жергілікті экономиканы көтеру бағытында маңызды стратегиялық жобаға айналады.
