Арыс қаласында экономиканы әртараптандыру және шағын әрі орта кәсіпкерлікті қолдау мақсатында жаңа өндірістік парктің құрылысы қарқынды түрде жүргізілуде. Қала әкімі Қайсар Маңқараев нысанға арнайы барып, құрылыс барысын тексерді. Ол мердігер ұйымдарға құрылыс қарқынын бәсеңдетпей, жұмыстарды мерзімінде және сапалы аяқтауды қатаң тапсырды. Сонымен қатар, қала басшысы жобаны іске асыру арқылы жаңа жұмыс орындарын ашу және өңірдегі кәсіпкерлікті дамытуға басымдық берілетінін атап өтті.
Құрылыс аумағы – 1,44 гектар. Қазіргі уақытта жер бедерін тегістеу, инфрақұрылым тарту, электр, су, канализация және жол желілерін жүргізу жұмыстары жүріп жатыр. Сонымен қатар, өндірістік парктің шекарасын белгілеу, қоршау орнату, қауіпсіздік шараларын қамтамасыз ету және жүк тиеу аймақтарын дайындау жұмыстары да жүргізілуде.
Өндірістік паркте бірнеше бағыттағы кәсіпорындар жоспарланған:
- Термопанель өндірісі – тұрғын үйлер мен кәсіпкерлік нысандарын жылу оқшаулаумен қамтамасыз етуге бағытталған;
- Пластик есік-терезе өндірісі – сапалы және энергия үнемдейтін материалдарды шығару;
- Жиһаз өндірісі – тұрғын үйлер мен офистік кеңістіктерге арналған жиһаздарды дайындау;
- Бақша өнімдерін терең өңдеу цехы – жергілікті фермерлердің өнімдерін сақтау және қайта өңдеу арқылы нарыққа шығару;
- Тротуар плиталары мен жол жиектері бетондары өндірісі – қала мен ауданның инфрақұрылымдық жобаларына материалдар жеткізу.
Жобаның жалпы құны – 215 миллион теңге. Өндірістік парк іске қосылған жағдайда 30-дан астам адам тұрақты жұмыспен қамтылмақ. Сонымен қатар, өндіріс орындары маусымдық жұмыспен қамтуды да қарастырады, бұл жергілікті тұрғындар үшін қосымша табыс көзі болады.
Қала әкімдігі атап өткендей, өндірістік парктің іске қосылуы Арыс қаласының индустриялық әлеуетін арттыруға, шағын және орта кәсіпкерлікті дамытуға, инвестициялық белсенділікті күшейтуге, сондай-ақ өңірдегі әлеуметтік-экономикалық жағдайды жақсартуға бағытталған маңызды қадам болып саналады.
Бұдан бөлек, өндірістік парк құрылысында экологиялық стандарттарға сай технологиялар енгізілуде, қоршаған ортаға зиянсыз өндіріс жүргізу, қалдықтарды қайта өңдеу және энергия үнемдеуді қамтамасыз ету басты назарда. Бұл қаланың тұрақты дамуына және тұрғындардың өмір сүру сапасын жақсартуға септігін тигізеді.
