Бүгінгі күннің басты талаптарының бірі – кәсіби мамандарды заманауи технологиялармен қаруландыру. Осы орайда, Шымкент қаласындағы Энергетика және байланыс колледжінде «Пошта байланысының операторы» мамандығы бойынша оқу процесі халықаралық білім беру стандарттарына сай, заманауи бағытта жүзеге асырылуда.
Колледждің өндірістік оқыту шебері және арнайы пән оқытушысы Г.Б. Нұрбаеваның ұйымдастыруымен «Ішкі тапсырысты хаттарды қабылдау, өңдеу» тақырыбында өткізілген ашық сабақ – осының жарқын дәлелі. Сабақтың негізгі мақсаты – студенттерге пошталық жөнелтілімдердің цифрлық қабылдануы мен өңделуі бойынша кешенді білім беру, кәсіби құзыреттіліктерін арттыру, логистика мен пошта қызметіндегі инновациялық үдерістермен таныстыру болды.
Сабақ барысында студенттер пошта жөнелтілімдерін қабылдау, сұрыптау және жеткізу үдерісін заманауи ақпараттық-коммуникациялық технологиялар (ICT – Information and Communication Technologies) көмегімен үйренді. Бұл бағыттағы білім беру – болашақ пошта операторлары үшін аса маңызды. Өйткені бүгінгі электрондық үкімет (e-Government), электрондық коммерция (e-Commerce) және цифрлық логистика (Digital Logistics) салаларында білікті мамандарға сұраныс күн санап артып келеді.
Ашық сабақта студенттер ішкі тапсырысты хаттардың қабылдануы мен өңделу сатысындағы негізгі регламенттермен, сонымен қатар халықаралық пошталық кодтар, сандық жүйедегі тіркеу және қадағалау процестерімен танысты. Практикалық бөлімде студенттер пошта жүйесінің автоматтандырылған бағдарламаларын пайдалана отырып, хаттарды сұрыптап, дерекқорға тіркеу, жөнелту кезеңдерін игерді.
Сабақтың тағы бір маңызды тұсы – кәсіби терминологияны меңгеру. Студенттерге пошта саласына қатысты халықаралық терминдер, мысалы, «tracking number», «postal item», «sorting system», «dispatch process» сияқты ұғымдардың мағынасы түсіндіріліп, оларды қазақшаға аудару және күнделікті кәсіби қарым-қатынаста қолдану жолдары көрсетілді. Бұл олардың тілдік құзыреттілігін, кәсіби лексикасын дамытуға сеп болды.
Сабақ барысында белсенді оқыту әдістері қолданылды: рөлдік ойындар, практикалық тапсырмалар, интерактивті викториналар мен case study форматындағы жағдайларды талдау. Бұл тәсілдер студенттердің қызығушылығын арттырып, мамандыққа деген ынта-ықыласын оятты.
Г.Б. Нұрбаеваның айтуынша, мұндай тәжірибелік сабақтар студенттердің тек теориялық біліммен шектеліп қалмай, кәсіби машықтарын нақты өндірістік жағдайларда жетілдіруіне мүмкіндік береді. «Бүгінгі студент – ертеңгі бәсекеге қабілетті маман. Сондықтан біз заманауи білім беру технологияларын, халықаралық талаптарға сәйкес кәсіби стандарттарды оқу үдерісіне енгізуге ерекше назар аударамыз», – дейді ұстаз.
Ашық сабақ қорытындысы бойынша студенттерге кері байланыс беріліп, олардың дағдылары мен біліміне сараптама жүргізілді. Сабақ жоғары деңгейде өтіп, студенттер мен әріптестер тарапынан оң бағасын алды.
Білім мен тәжірибені ұштастырған осындай игі бастамалар Шымкент қаласындағы кәсіптік-техникалық білім беру саласының дамуына, бәсекеге қабілетті мамандарды даярлауға үлкен серпін беретіні сөзсіз.
