Шымкент қаласындағы Әл-Фараби атындағы ғылыми-әмбебап кітапханада Қазақстанның көрнекті ғалымы, Мемлекеттік сыйлықтың лауреаты, әдебиеттанушы, абайтану ғылымының негізін қалаушылардың бірі – профессор Мекемтас Мырзахметұлының туғанына 95 жыл толуына арналған «Ұлт руханиятының абызы» атты халықаралық ғылыми-мәдени форматтағы еске алу кеші өтті. Іс-шара «Kitap Time – 2025» республикалық кітап фестивалі аясында ұйымдастырылды және академиялық гуманитарлық қауымдастық үшін маңызды тарихи-танымдық платформа ретінде танылды.
Іс-шараға М.Әуезов атындағы Оңтүстік Қазақстан зерттеу университетінің (ОҚЗУ) профессор-оқытушылар құрамы, филология және гуманитарлық ғылымдар саласындағы жетекші ғалымдар, докторанттар мен магистранттар, сондай-ақ отандық мәдениет және БАҚ өкілдері қатысты. Академиялық форматта өткен бұл кеш ғылыми-публицистикалық бағыттағы баяндамалар, деректі презентациялар мен архивтік материалдарға негізделген интеллектуалды сұхбат алаңына айналды.
Кешті М.Әуезов атындағы ОҚЗУ-дың PhD докторанты, жас зерттеуші, әрі Мекемтас Мырзахметұлының тікелей ғылыми шәкірті – Әзімхан Исабек жүргізді. Ол модератор ретінде профессордың ғылыми мектебінің қалыптасу жолы, абайтану саласына енгізген терминологиялық жаңалықтары, гуманитарлық ғылымдағы ұлттық парадигма концепциясын дамытудағы рөлі жөнінде нақты ғылыми-әдістемелік мәліметтермен бөлісті.
Кештің мазмұндық құрылымында профессор Мырзахметұлының қазақстандық әдебиеттану ғылымының модернизациялануы, философиялық герменевтика, интерпретациялық әдіснама және постколониялық дискурс тұрғысынан енгізген академиялық ұстанымдары кеңінен талқыланды. Оның шығармашылығы ұлттық идея, рухани мұра және интеллектуалды тәуелсіздік ұғымдарының шеңберінде қарастырылды.
Іс-шарада баяндама жасаған университет ғалымдары:
- ф.ғ.к., доцент Ақжол Қалшабек – «Мекемтас Мырзахметұлының абайтанудағы пәнаралық тәсілі: әдебиет, философия және тарих» тақырыбында баяндама жасап, оның ұлт мүддесіне негізделген ғылыми методологиясын талдады;
- ф.ғ.к., декан Әзімхан Ыбырайым – профессордың ғылыми-академиялық мектебінің қалыптасуы, оның шәкірттер жүйесі мен ғылыми мұрагерлік мәселелеріне тоқталды;
- Жазушы-драматург Захан Қыстаубайұлы, жазушы-журналист Қалмахан Дүйсенбі, журналист әрі әдебиет зерттеушісі Сапарғали Исақ – ғалымның қоғамдық ой мен ұлттық әдеби сана қалыптастырудағы орны туралы естеліктерімен бөлісті.
Кеш барысында Мекемтас Мырзахметұлының шығармашылығы мен ғылыми ізденістері бойынша дайындалған бейнематериалдар мен библиографиялық көрме ұсынылды. Атап айтқанда:
- «Абайды танытудағы ұлттық көзқарас»,
- «Әдебиет пен тарихтағы концептуалды тұтастық»,
- «Ұлттық код және тарихи жады» тақырыбындағы еңбектері заманауи цифрлық форматта таныстырылып, гуманитарлық ғылымдағы репрезентациялық модельдер контекстінде қарастырылды.
