«Біздің болашағымыз – білімді, саналы, отаншыл ұрпақтың қолында. Жастардың тәрбиесі – стратегиялық маңызы бар міндет», – деген Мемлекет басшысы Қасым-Жомарт Тоқаевтың сөзі Шардарада өткен ардагерлер басқосуында басты тақырыпқа айналды.
Аудандық және қалалық ардагерлер ұйымдарының қызметін талдау, алдағы жоспарларды нақтылау және «Ұрпақ тәрбиесіндегі – бетбұрыс» атты жиынға Түркістан облыстық ардагерлер кеңесі төрағасының орынбасары Бақытжан Раманқұлов, Шардара ауданы әкімінің орынбасары Бейсенбай Төребеков, аудандық ардагерлер кеңесінің төрағасы Тоқсанбай Бердібеков, сондай-ақ «Әкелер мектебі» мен «Әжелер алқасы» ұйымдарының мүшелері қатысты.
Кездесу барысында жас ұрпаққа тәрбие беру – ел болашағы үшін ең өзекті мәселенің бірі екені айтылды. Қатысушылар ой-пікірлерін ортаға салып, жастарды ұлттық құндылықтарға баулуда жаңа тәсілдер қажет екенін баса айтты.
– Бүгінгі жастардың саналы болып өсуі – елдің ертеңгі іргетасы. Ұрпақ тәрбиесі – баршамыздың ортақ міндетіміз. Бұл бағытта бірлесе атқарған еңбек қана нәтижелі болмақ, – деді Ардагерлер кеңесінің мүшесі.
Жиын соңында жастар тәрбиесіне арналған тақырыптық қойылымдар өткізу, заманауи тәрбие формаларын енгізу және ұрпақтар сабақтастығын нығайтуға бағытталған кешенді бағдарлама әзірлеу жөнінде нақты ұсыныстар жасалды.
