Үшінші мегаполистегі жетекші жоғары оқу орындарының бірі – М. Әуезов атындағы Оңтүстік Қазақстан университеті тағы бір маңызды ғылыми жетістікпен толықты. Университеттің «Сәулет, құрылыс және көлік» факультетінің профессоры, «Тіршілік қауіпсіздігі және қоршаған ортаны қорғау» кафедрасының оқытушысы, техника ғылымдарының кандидаты, Адам қауіпсіздігі және экологиясы жөніндегі Халықаралық Ғылым Академиясының корреспондент-мүшесі Колесников Александр Сергеевич халықаралық деңгейде мойындалған беделді ғылыми рейтингке енді.
2020–2024 жылдар аралығындағы Web of Science деректері бойынша Колесников Александр Сергеевич Қазақстандағы химия ғылымдары саласындағы ең көп дәйексөз келтірілген ТОП-50 ғалымның қатарынан көрініп, 29-шы орынды иеленді.
Аталған рейтинг әлемдік ғылыми қауымдастықта интеллектуалдық ықпалдың жоғары деңгейін, сондай-ақ зерттеушінің ғылыми жарияланымдарының өзектілігі мен сапасын білдіретін маңызды көрсеткіштердің бірі болып саналады.
Рейтинг қалай қалыптастырылады?
Web of Science-тің екінші деңгейлі пәндік жіктеуішіне сүйене отырып, бір автордың жарияланымдарына келтірілген нормаланған дәйексөздер саны негізге алынады. Нақтырақ айтқанда:
- Ғалымның Web of Science Core Collection базасында индекстелетін жоғары импакт-факторлы журналдарда жариялаған мақалалары мен тезистері есепке алынды;
- Бірінші автор немесе автор-корреспондент ретіндегі жарияланымдарға басымдық берілді;
- Егер дәйексөздер саны тең болса, ғылыми еңбектердің жалпы саны ескерілді.
Бұл көрсеткіш профессор Колесниковтің ғылыми зерттеулерінің халықаралық ғылыми қауымдастық тарапынан жоғары сұранысқа ие екенін дәлелдейді. Оның еңбектері экологиялық қауіпсіздік, техногендік тәуекелдерді басқару, қоршаған ортаны қорғау жүйелерін оңтайландыру сынды заманауи және стратегиялық маңызы зор бағыттарды қамтиды.
М. Әуезов атындағы ОҚУ үшін бұл жетістік – университеттің академиялық беделін көтеретін, ғылым мен инновацияны интернационалдандыру үдерісін жеделдететін және жоғары білікті кадрлар даярлау ісінде ғылыми орта құруға ықпал ететін маңызды нәтиже.
🔹 Сонымен қатар, бұл нәтиже:
- Университеттің QS және Times Higher Education сияқты жаһандық рейтингтердегі позициясын нығайтады;
- Ғалымның ғылыми-зерттеу жобаларына халықаралық гранттар мен серіктестіктер тартуға мүмкіндік береді;
- Үшінші мегаполистегі ғылым мен жоғары білімді дамытудың драйвері ретінде университеттің стратегиялық рөлін көрсетеді.
Колесников Александр Сергеевичті осы зор жетістігімен құттықтай отырып, алдағы ғылыми-зерттеу жұмыстарына табыс, жаңа биіктер мен халықаралық ынтымақтастық аясын кеңейтуге тілектестік білдіреміз.
