Гуманитарлық интеграция және білім арқылы мәдени байланысты нығайту – заманауи жаһандық мегаполистер мен ұлттық мемлекеттердің басты даму бағытына айналып отыр. Осы үдерісте шетелдегі этникалық қазақтардың білімге қолжетімділігін арттыру және оларды Қазақстанның жоғары білім жүйесіне тиімді тарту – стратегиялық маңызы бар мәселе. Осы мақсатта М.Әуезов атындағы Оңтүстік Қазақстан университеті жанындағы Дайындық орталығы жыл сайын көршілес мемлекеттерге мақсатты іссапарлар ұйымдастырып, қандастармен байланыс орнатып келеді.
2025 жылдың қыркүйек айының алғашқы аптасында Дайындық орталығының директоры Рахымбек Камалдинов пен жетекші оқытушылар – Асан Үсіпов және Ғалым Қасымхан – Өзбекстан Республикасына арнайы іссапармен барып қайтты. Іссапардың негізгі бағыты – Ташкент облысына қарасты Шыршық, Бостандық және Қыбырай аудандарындағы қазақ тілінде білім беретін ауыл мектептерін аралау болды. Мақсат – жергілікті мектеп түлектері мен олардың ата-аналарына Қазақстандағы жоғары білім алуға қатысты мүмкіндіктерді таныстыру және дайындық орталығының артықшылықтарын түсіндіру.
Сапар барысында оқытушылар мектеп директорларымен, пән мұғалімдерімен және ауылдық білім беру мекемелерінің әкімшілік өкілдерімен кездесіп, білім алуға ынталы, бірақ түрлі себептермен мемлекеттік емтиханнан төмен нәтиже көрсеткен 11-сынып түлектеріне қолдау көрсету жолдарын талқылады. Сонымен қатар, мемлекеттік грант, арнайы квота және қандастарға арналған білім беру жеңілдіктері туралы жан-жақты ақпарат берілді.
Қандастарымызға жасалған академиялық жеңілдіктер – Қазақстан Республикасының көші-қон саясаты мен ұлттық білім беру стратегиясының өзара тоғысуының нәтижесі. Атап айтқанда, Қазақстан тарихы пәнінен емтихан тапсыру талаптарының алынып тасталуы және шектік баллдың жойылуы – дайындық орталығында білім алуға деген сұранысты арттырды. Бұл – инклюзивті білім беру қағидаттарына негізделген, мәдени-лингвистикалық бейімделуді оңтайландыруға бағытталған қадам.
Аталған ауылдық аймақтардағы тұрғындармен жүргізілген ақпараттық-түсіндіру жұмыстары барысында көптеген ата-аналар балаларын Қазақстанда білім алуға ниетті екенін білдіріп, нақты шешім қабылдады. Олар дайындық орталығына құжаттарын тапсырған түлектерінің болашақта ел дамуына үлес қосатын білікті маман боларына сенімді.
Бұл сапар – тек талапкерлермен жұмыс жүргізу ғана емес, сонымен қатар трансшекаралық академиялық байланыстарды нығайтудың тиімді құралы. Ғылыми-педагогикалық қызметкерлер қазақ диаспорасы шоғырланған аймақтарда ұлттық бірегейлік пен мәдени сабақтастықты сақтаудың маңыздылығын атап өтті. Осылайша, Дайындық орталығы тек білім ордасы ғана емес, сондай-ақ этникалық репатриация процесінде маңызды әлеуметтік институт рөлін атқарып отыр.
