Жиынға Түркістан облыстық ардагерлер кеңесі төрағасының бірінші орынбасары Әбдішүкір Әбдімәлікұлы Сапарбеков, Отырар ауданы әкімінің орынбасары Айдос Құлмақанұлы, аудандық Ардагерлер кеңесі төрағасының орынбасары Әбікей Таңат, еңбек ардагері Мәрия Белгібаева, сондай-ақ «Әкелер мектебі» мен «Әжелер алқасы» ұйымдарының мүшелері қатысты.
Басқосу барысында қоғам үшін ең өзекті тақырыптардың бірі – жас ұрпақ тәрбиесі кеңінен сөз болды. Қатысушылар ой-пікірлерін ортаға салып, жастарды тәрбиелеуде жаңа тәсілдер қажет екеніне тоқталды.
– Бүгінгі жастардың саналы болып өсуі – елдің ертеңгі іргетасы. Сондықтан ұрпақ тәрбиесі – баршамыздың ортақ міндетіміз. Бұл бағытта бірлесе атқарған еңбек қана нәтижелі болмақ, – деп атап өтті ардагерлер кеңесінің мүшелері.
Жиынға қатысушылар жас ұрпаққа тәлім-тәрбие беруде тың бастамаларды қолдау қажеттігін айтып, қоғамның барлық өкілдері жұмыла кірісуі тиіс екенін жеткізді. Сондай-ақ кездесу барысында ұрпақ тәрбиесіне арналған тақырыптық қойылымдар ұйымдастыру, заманауи тәрбие формаларын енгізу және сабақтастықты нығайту үшін кешенді бағдарлама әзірлеу жөнінде ұсыныстар жасалды.
