Биылғы жылдың 27-29 тамыз аралығында Шымкент қаласының дін істері басқармасының ұйымдастыруымен мемлекеттік әлеуметтік тапсырыс аясында «Дін мәселелерін зерттеу орталығы» КММ-нің теологтары, Қазақстан мұсылмандар діни басқармасының Шымкент қаласы бойынша өкілділігінің имамдарды және Шымкент қаласы әкімдігі жанындағы ақпараттық-түсіндіру топ мүшелерінің біліктілігін арттыру мақсатында, М.Әуезов атындағы ОҚУ-дің бас ғимаратында 3 күндік оқыту курстары өтті. Бұл шараға ҚР Мәдениет және ақпарат министрлігінің Дін істер комитетінің өкілдері, Республикалық ақпараттық-түсіндіру тобының (РАТТ) мүшелері, жоғары оқу орнының ғалымдары мен тәжірибелі теологтар дәріскер ретінде қатысып, маңызды тақырыптар бойынша тың мәліметтермен бөлісті.
Алғашқы күн – экстремизмнің алдын алу және халықаралық тәжірибе
27 тамыз күні өткен алғашқы дәрістер барысында қатысушыларға ҚР Мәдениет және ақпарат министрлігінің Дін істер комитетінің өкілдері интернет кеңістікте діни экстремизмнің алдын алу жолдарын түсіндірді. Басқарма басшысы Жапал Әмзебекұлы онлайн ортадағы радикалды ағымдардың ықпалынан қорғау тәсілдерін атап өтті.
Сондай-ақ, Дінтану сараптамасы басқармасының басшысы Нұрғали Бердіқұлұлы діни сараптама жүргізудің ерекшеліктері мен экстремизмнің алдын алу шаралары жөнінде баяндама жасады.
Бұдан бөлек, халықаралық құқық саласының маманы, PhD доктор Ермек Төленұлы діни экстремизммен күрес мәселелерін халықаралық-құқықтық тұрғыдан реттеу тақырыбында дәріс оқып, әлемдік тәжірибеден мысалдар келтірді.
Ал «SAPSAN» стратегиялық орталығының жетекші сарапшылары Жандәулет Отарбайұлы мен Дінмұхамед Әбубәкірұлы ұлттық қауіпсіздік мәселесінде діни секьюритизацияның рөлі мен деструктивті ағымдармен күрестегі тәжірибелік аспектілерге тоқталды.
«SAPSAN» стратегиялық орталығының директоры Жандәулет Сүлейменов бірнеше секцияда ұлттық қауіпсіздіктегі діни секьюритизация мәселесін жан-жақты талқылап, қатысушылардың сұрақтарына жауап берді.
Ал орталықтың бөлім басшысы, теолог Дінмұхамед Тойғылы деструктивті діни ағымдардың ықпалы мен олардың алдын алу бойынша практикалық тәсілдерді түсіндірді.
Халықаралық құқық маманы Ермек Бекбосынов тағы да құқықтық реттеу механизмдеріне тоқталып, халықаралық деңгейде экстремизммен күрестің тәжірибесін саралады.
Сондай-ақ, М.Әуезов атындағы ОҚУ-дің «Саясаттану» кафедрасының меңгерушісі, философия ғылымдарының кандидаты Сәкен Мажінбеков діни қауіпсіздік пен ұлттық идеология мәселелерін ғылыми тұрғыда түсіндірсе, РАТТ мүшесі, белгілі дінтанушы Алау Әділбаев тәжірибелік бағыттағы ойларын ортаға салды.
Оқыту курстары барысында қатысушылар діни экстремизмнің алдын алу, деструктивті ағымдармен күресу, интернет кеңістіктегі қауіпсіздік және ұлттық мүддені қорғау мәселелеріне қатысты мол мағлұмат алды.
Жалпы, аталған шараның басты мақсаты – имамдар мен теологтардың кәсіби біліктілігін арттырып, өңірдегі ақпараттық-түсіндіру топтарының жұмыс сапасын жаңа деңгейге көтеру.
