2025 жылдың алғашқы жартысында «Өрлеу» біліктілікті арттыру ұлттық орталығының Шымкент қаласы бойынша Кәсіби даму институты өңір педагогтерінің кәсіби құзыреттерін жетілдіру және үздіксіз білім беру үдерісін қамтамасыз ету мақсатында бірқатар жүйелі жұмыстар жүргізді.
Жоспарға сәйкес, аталған кезеңде 128 біліктілікті арттыру курсын өткізу және 3233 педагогты қамту көзделген болатын. Бұл курстар Қазақстан Республикасының білім беру саласын жаңғыртуға бағытталған мемлекеттік білім беру саясатының басымдықтарына сай ұйымдастырылды.
Жартыжылдықтың қорытындысы бойынша төмендегідей нәтижелерге қол жеткізілді: 46 курс сәтті аяқталды;1143 педагог біліктілігін арттырды;
Курстардың мазмұны білім берудегі заманауи өзгерістерді, педагогтердің сұранысын және кәсіби даму қажеттіліктерін ескере отырып әзірленді. Бағдарламаларда инклюзивті білім беру, құндылыққа негізделген тәрбие, жаңартылған білім мазмұны, цифрлық сауаттылық, креативті педагогика, критериалды бағалау, функционалдық сауаттылықты қалыптастыру және STEAM-білім беру бағыттары қамтылды.
Оқыту үдерісі күндізгі және қашықтықтан форматта өтті. Бұл форматтар педагогтерге ыңғайлы ортада білім алуға, кәсіби тәжірибемен еркін алмасуға мүмкіндік берді. Курстар барысында тренингтер, практикалық семинарлар, жобалық жұмыстар, ашық сабақтар мен рефлексиялық сессиялар ұйымдастырылып, тыңдаушылардың белсенді қатысуымен өтті.
Біліктілікті арттыру курстарының сапалы өтуіне институттың кәсіби тренерлері мен тәжірибелі оқытушылары, сондай-ақ саладағы жетекші мамандар жұмылдырылды. Олар педагогтерге практикалық бағыттағы, заманауи білім беру технологияларына негізделген мазмұн ұсынды.
Курс тыңдаушылары тарапынан білім мазмұнының өзектілігіне, оқыту әдістерінің тиімділігіне және оқыту ортасының қолайлы болуына қатысты оң пікірлер айтылды. Сонымен қатар, курстан кейінгі кері байланыс барысында қатысушылар алған білімдерін күнделікті тәжірибесінде тиімді қолдана алатындарын атап өтті.
«Өрлеу» Кәсіби даму институты педагогтердің кәсіби өсімін қамтамасыз ету жолындағы жұмыстарды алдағы уақытта да жалғастырады. Екінші жартыжылдықта да жоспарланған курстар аясында өңір педагогтері үшін мазмұнды әрі нәтижеге бағытталған оқу бағдарламалары іске асырылатын болады.
Бұл көрсеткіштер өңірдегі білім беру сапасын арттыруға бағытталған жүйелі жұмыстың нақты нәтижесі болып табылады. Білікті педагог – сапалы білімнің кепілі екенін назарда ұстаған институт ұжымы педагогтердің кәсіби дамуына жан-жақты қолдау көрсетуді одан әрі жалғастырады.
