Білім – болашақтың кепілі. Бұл қағида әсіресе елімізде жыл сайын өткізілетін Ұлттық бірыңғай тестілеу (ҰБТ) кезінде айқын көрініс табады. 2025 жылғы ҰБТ нәтижелері бойынша Шымкент қаласындағы Zerdeli High School білім беру мекемесінің 11-сынып оқушысы Асылхан Дінмұхаммед зор жетістікке жетіп, барша жұртшылықтың назарын өзіне аударды. Ол информатика-математика комбинациясы бойынша 138 балл жинап, Шымкент қаласы бойынша ең жоғары көрсеткіштердің бірін көрсетті.
Тестілеу Жұмабек Тәшенев атындағы университет жанындағы №609 ҰБТ тапсыру пунктінде өтті. Бұл орталық бірнеше жылдан бері талапкерлерге ыңғайлы жағдай жасап, әділ және ашық түрде сынақ тапсыруды ұйымдастырып келеді. Мұндағы техникалық жабдықталу, тестілеу жүйесінің қауіпсіздігі мен бейнебақылау арқылы бақылау талапкерлердің барынша әділ бағалануына кепілдік береді.
Асылхан Дінмұхаммедтің жинаған 138 ұпайы – тек Шымкент қаласы емес, жалпы республика көлеміндегі ең жоғары нәтижелердің қатарында. Бұған дейін Түркістан облысының бір түлегі 140 балл жинап, биылғы науқан аясындағы ең жоғары нәтижені тіркеген болатын. Асылханның көрсеткіші — осы деңгейге жуық ең үздік нәтижелердің бірі ретінде бағаланып отыр.
Zerdeli High School – еліміздегі білім сапасы жоғары, дарынды балаларға арналған заманауи мектептердің бірі. Бұл білім ордасының түлектері жыл сайын республикалық, халықаралық олимпиадалар мен түрлі байқауларда жоғары жетістіктерге жетіп келеді. Мектеп ұжымы әрбір оқушының жеке қабілетін ескеріп, заманауи әдістемелерді тиімді қолданып, нәтижеге бағытталған жүйелі жұмыс жүргізуде. Асылханның бұл жетістігі – осы мектептің, ұстаздар ұжымының еңбегінің жемісі.
Жоғары балл жинау – талапкер үшін болашаққа ашылған даңғыл жол. Бұл көрсеткіштің арқасында Асылхан еліміздің немесе шетелдің жетекші жоғары оқу орындарына еш қиындықсыз грант негізінде оқуға түсу мүмкіндігіне ие. Оның болашақта ІТ, инженерия, деректер ғылымы сынды заманауи, сұранысқа ие салаларды таңдайтыны анық.
Асылханның өзі бұл жетістікке ұзақ әрі табанды дайындықтың арқасында жеткенін атап өтеді. Ол өз күшіне сеніп, күнделікті жаттығу мен тәртіпті басты қағида еткен. «ҰБТ – тек білім емес, сабыр мен тұрақтылықтың да сынағы» – дейді жас түлек.
Мұндай көрсеткіштер – еліміздегі орта білім сапасының жоғарылап келе жатқанын, білімге құштар, ізденімпаз жастардың көбейгенін көрсетеді.
