Қытайдың Шугуан ауданына барған Ордабасы делегациясы сапарды таңғы сәттен бастады. 6 700 гектарға созылған жылыжайлар белдеуі алыстан-ақ жылтыраған әйнектерімен ерекше көрініс береді. Алып аумақта көкөністердің, гүлдердің және селекциялық тұқымдардың саналуан түрі өсірілетіні – өңірдің ауыл шаруашылығына деген ерекше көзқарасын көрсетеді.
880 гектарлық жылыжай – нағыз цифрлық ферма
«Shandong Shuguang» кешеніне кірген сәтте делегация мүшелері температураның ерекше тұрақтылығын бірден сезді. Сыртта ауа райы салқын болғанымен, жылыжай ішінде тропикалық климат орнатылған. Қызанақ алқаптарының арасына орнатылған датчиктер үнемі ақпарат беріп тұрады. Көкөністердің өсуін бақылайтын камералар, автоматты желдеткіштер, тамшылатып суару жүйесі – бәрі де жоғары технологиялардың үйлесімді жұмысын көрсетіп тұр.
Жергілікті маман делегацияға былай деп түсінік берді:
«Біз өсімдіктің әр минуттағы жағдайын біле аламыз. Температура бір градусқа өзгерсе, жүйе дереу әрекет етеді. Осылайша өнім сапасын жоғалтпаймыз».
Делегация мүшелері жылыжай ішінде өсірілетін жаңа селекциялық сұрыптармен танысып, олардың Қазақстан климатына икемделу мүмкіндігін сұрастырды.
Музей – еңбек пен технологияның тарихы
Келесі бағыт – жылыжай тарихы музейі. Мұнда ағаш қаңқалы алғашқы жылыжайлар, қарапайым суару әдістері, алғашқы селекционерлердің еңбегі көрініс тапқан. Қытайдың ауыл шаруашылығына деген еңбегі мен табандылығы айқын сезіледі.
Музей қызметкері жылдар бойғы жетістіктерді көрсете отырып:
«Қазір біз роботтармен, датчиктермен жұмыс істейміз. Бірақ бұл жолдың ар жағында мыңдаған шаруаның еңбегі жатыр», – деді.
Зауыттағы жұмыс процесі – жоғары дәлдік пен зертханалық бақылау
Делегация барған пленка өндіру зауытында өндіріс бірнеше кезеңде жүргізіледі:
- шикізатты таңдау;
- оны зертханалық тексеру;
- көпқабатты пленка қалыптастыру;
- температураға төзімділігін сынау;
- дайын өнімді орау.
Ордабасылық мамандар пленканың қалыңдығын өлшейтін арнайы құрылғыға ерекше назар аударды. Бұл материал жылдар бойы бүлінбейтіндей етіп дайындалады.
Делегация барған гүл жылыжайларында раушан, лалагүл, хризантема және ондаған сәндік өсімдік түрі бар. Гүлдер арнайы жарықпен өсіріледі, әрқайсысының өзіндік климат жүйесі бар. Қытайда гүл шаруашылығының да табысы зор екендігі нақты деректермен түсіндірілді.
Сапар әсері
Қытай сапары Ордабасы делегациясына тек ақпараттық тәжірибе ғана емес, нақты жоспар жасауға мүмкіндік берді. Делегация мүшелері мұндай кешендерді қалыптастыру үшін инфрақұрылым, технология, мамандар даярлау, нақты жоспарлау қажет екенін атап өтті.
