Білім беру жүйесінің цифрлануы – жаһандық даму үдерістеріне сәйкес келетін стратегиялық бағыттардың бірі. Бұл бағыттағы жұмыстар Қазақстанның үшінші мегаполисі – Шымкент қаласында қарқынды жүзеге асуда. Қалалық білім беру ұйымдарын ақпараттық қауіпсіздік, цифрлық бақылау, инновациялық басқару сынды талаптарға сәйкестендіру мақсатында жалпы орта білім беретін мектептерге заманауи аппараттық-бағдарламалық кешендер (АБК) орнату жұмыстары жүргізілді.
Жүргізілген талдау нәтижесінде 151 мектепке АБК орнату қажеттілігі анықталды. Осыны негізге ала отырып, келесі шаралар жүзеге асырылды:
98 мектепке – «Alaqan Mektep» кешені орнатылды.
Бұл жүйе оқушылардың мектепке келуі мен кетуін, қозғалысын, қауіпсіздігін бақылауға арналған биометриялық және RFID технологияларымен жабдықталған. Сонымен қатар, ата-аналарға онлайн-мониторинг мүмкіндігін ұсына отырып, білім беру процесінің ашықтығын қамтамасыз етеді.
53 мектепке – «E-Ashana» АБК жүйесі енгізілді.
Бұл кешен мектеп асханаларындағы ақылды төлем жүйелері, тамақтану мониторингі және әлеуметтік әмиянмен интеграцияланған функционал арқылы балалардың тамақтануын цифрлық форматта бақылауға мүмкіндік береді.
Барлығы 151 мектепке толықтай АБК орнатылып, жүйелер әлеуметтік әмиянмен интеграцияланды.
Бұл атаулы әлеуметтік көмекті алушылар үшін қолжетімділікті арттырып, оқушылардың нақты қажеттіліктерін анықтауға, бюджет қаражатын ашық әрі тиімді басқаруға жағдай жасайды.
Аталған аппараттық-бағдарламалық кешендер:
- Мектептегі қауіпсіздік жүйесін автоматтандырады;
- Оқушының цифрлық профилін қалыптастыруға жол ашады;
- Білім беру ұйымдарын Big Data, AI-талдау, цифрлық бақылау құралдары арқылы басқаруға мүмкіндік береді.
Бұл жаңашыл шешімдер мектеп әкімшілігі мен ата-аналар арасындағы байланысты нығайтып, оқу орнының басқару үдерісін деректерге негізделген заманауи форматқа көшіруге мүмкіндік береді. Сонымен қатар, бұл жүйелер цифрлық теңсіздікті азайту, әлеуметтік осал топтарды қолдау, дербестендірілген мониторинг жасау сынды маңызды әлеуметтік функцияларды орындайды.
Үшінші мегаполис – Шымкент қаласы цифрлық білім беру инфрақұрылымын жетілдіру арқылы оқушылардың қауіпсіз әрі қолайлы ортада білім алуына жағдай жасап отыр. Бұл бастама қала мектептерінің цифрлық сауаттылығы мен басқару тиімділігін жаңа деңгейге көтеріп, заманауи Smart Education концепциясына көшуге нақты қадам болып табылады.
