Жаһандану үдерісімен қатар жүріп жатқан академиялық мобильділік аясында шетелдік азаматтардың Қазақстанның жетекші жоғары оқу орындарында білім алуға деген қызығушылығы артуда. Соның жарқын көрінісі ретінде Оңтүстік Қазақстан педагогикалық университетінде (Жәнібеков университеті) білім алып жатқан 180-ге жуық шетелдік студентті атап өтуге болады. Бұл студенттердің дені Өзбекстан Республикасынан, сондай-ақ Қытай Халық Республикасы мен Үндістаннан келген білім алушылар да бар.
Оқу ордасында халықаралық білім алушылардың құқықтық, әлеуметтік және академиялық қауіпсіздігін қамтамасыз ету мақсатында арнайы түсіндіру кеңесі өтті. Іс-шараға факультет декандары, кафедра меңгерушілері және халықаралық студенттер тікелей қатысты. Кеңестің басты мақсаты – студенттер арасында әлеуметтік-психологиялық тұрақтылықты қалыптастыру, мәдениетаралық коммуникацияны нығайту және әлеуетті тәуекелдердің алдын алу.
Университеттің стратегиялық даму және әлеуметтік істер жөніндегі проректоры Баршагүл Қашқынқызы Исабек студенттерге жоғары оқу орнының ішкі регламенті, құқықтық міндеттемелері мен академиялық этика қағидаттары жөнінде кеңінен ақпарат берді. Сонымен қатар, «Мейірім» медициналық орталығы мен психологиялық қолдау қызметінің жұмыс бағыттарымен, заң бөлімінің және ішкі комплаенс-қызметінің өкілдерімен таныстырды. Проректор білім алушылардың құқығын қорғау және олардың оқу процесінде кездесетін мәселелерді институционал деңгейде шешу жолдарын атап өтті.
Жиын барысында тәрбие және жастар саясаты департаментінің директоры Қанат Анарбеков әлеуметтік медианың әсері, сандық платформалардағы мінез-құлық мәдениеті және студенттер арасындағы медиативті қарым-қатынасты дамыту бағытында баяндама жасады. Ал жастар ісі жөніндегі бөлім басшысы Нұргерім Нұрлан жатақхана инфрақұрылымы, орынмен қамтамасыз ету және тұрғындардың бейімделу кезеңдері бойынша ақпарат ұсынды.
Шымқала жастарының әл-ауқатын арттыру мен қауіпсіз ортаны қалыптастыру – университет әкімшілігінің басты стратегиялық міндеттерінің бірі. Осы ретте факультет басшыларына нақты тапсырмалар жүктеліп, әр студенттің мәселесіне жекелей назар аудару қажеттілігі баса айтылды. Қаржылық алаяқтық, заңсыз қаржы пирамидалары мен сыбайлас жемқорлық фактілерінен сақтану қажеттігі ерекше ескертілді.
Мегаполис деңгейіндегі урбанизация үдерісінде білім алушылардың қауіпсіздігін қамтамасыз ету – тек құқықтық емес, әлеуметтік және моральдық жауапкершілік. Осы бағытта жүргізіліп жатқан жұмыстар университеттің инклюзивті және көпмәдениетті білім беру кеңістігін қалыптастыруға бағытталған ұзақмерзімді стратегиясының бір бөлігі болып табылады.
