Қазіргі қоғамда білім тек жастарға ғана тиесілі деген көзқарас біртіндеп өзгеріп келеді. Бүгінде егде жастағы адамдардың да жаңашылдыққа ұмтылып, заман ағымынан қалмауға талпынуы қалыпты құбылысқа айналды. Осы бағыттағы маңызды бастамалардың бірі – «Күміс университет» халықаралық қозғалысы.
Бұл бастаманың басты мақсаты – аға буын өкілдеріне өмір бойы білім алуға мүмкіндік беру, олардың әлеуметтік белсенділігін арттырып, заман талабына сай бейімделуіне қолдау көрсету. Себебі білім мен даму – жасқа емес, ниет пен қажыр-қайратқа байланысты.
Осы халықаралық қозғалыстың идеяларын қолдай отырып, М.Әуезов атындағы Оңтүстік Қазақстан университеті 2021 жылдан бастап өзінің үшінші миссиясы – қоғамға қызмет ету бағытында «Салиқалы университет» атты жобаны іске қосты. Бұл жоба аға буын өкілдерінің кәсіби және шығармашылық әлеуетін дамытуға, олардың белсенді өмір салтын ұстануына мүмкіндік беруді көздейді.
Жобаның басты ұстанымы – «Ешқашан кеш емес». Егде жастағы адамдар үшін де жаңа технологияларды меңгеру, бақ күтіп-баптау, цифрлық сауаттылықты арттыру, жеке қызығушылықтарды дамыту – қоғамның белсенді мүшесі болып қалудың маңызды жолы.
64 зейнеткер – жаңа белестерге қадам
2021–2024 жылдар аралығында «Салиқалы университет» аясында 64 зейнеткер «Цифрлық куратор» және «Бағбан» атты екі бағыт бойынша арнайы курстардан өтті. Бұл курстар тыңдаушылардың күнделікті өмірінде қажет болатын практикалық дағдыларды меңгеруге бағытталды.
- 2021 жылы – 14 тыңдаушы
- 2022 жылы – 16 тыңдаушы
- 2023 жылы – 16 тыңдаушы
- 2024 жылы – 18 тыңдаушы
Бұл сандар – тек статистика ғана емес, зейнеткерлікке шықса да, жаңа білімге ұмтылған, өмірден өз орнын іздеген жандардың табандылығы мен жігерінің дәлелі.
- «Цифрлық куратор»
Бұл курс аясында тыңдаушылар смартфон, компьютер, мессенджерлер, онлайн-банкинг, электронды үкімет порталы (egov.kz) сияқты қазіргі заманғы цифрлық құралдарды қолдануды үйренді. Бұл білім олардың күнделікті өмірін жеңілдетіп, қоғаммен байланысын нығайтты. - «Бағбан»
Жерді дұрыс күтіп-баптау, көкөніс пен жеміс-жидек отырғызу, табиғи тыңайтқыштарды пайдалану, экологиялық бақша жүргізу – осы және өзге де пайдалы ақпараттар егде жастағы адамдарға үлкен қызығушылық тудырды. Курс практикалық бағытта өтті, қатысушылар өз бақтарында алған білімдерін қолданысқа енгізді.
Университет – тек жастардың емес, барша қоғамның ордасы
Бүгінде университеттің рөлі тек жастарға білім беру ғана емес, барлық жастағы азаматтарға өмірлік маңызы бар дағдыларды үйрету екенін уақыттың өзі көрсетіп отыр. М.Әуезов атындағы ОҚУ бұл міндетті сәтті орындап келеді. «Салиқалы университет» жобасы арқылы білім мен тәжірибе алмасудың, ұрпақтар сабақтастығының, әлеуметтік қолдаудың жаңа форматы қалыптасып жатыр.
Бұл бастама қоғамдағы инклюзивтілікті, толеранттылықты, ұрпақтар диалогын арттыруға септігін тигізеді. Жобаға қатысқан зейнеткерлер тек тыңдаушы болып қоймай, өз өмірлік тәжірибесімен де бөлісіп, жастарға үлгі болып отыр.
