Шымкент қаласы – XVI Азия чемпионатының алаңы. Бүгін үшінші мегаполисте құрлықтың ең ірі спорттық оқиғаларының бірі – спорттық атудан XVI Азия чемпионаты салтанатты түрде ашылды.
Ашылу рәсіміне Шымкент қаласының әкімі Ғабит Сыздықбеков, Қазақстан Республикасының Бас Прокуроры әрі Қазақстан спорттық ату федерациясының президенті Берік Асылов, ҚР Ғылым және жоғары білім министрі Саясат Нұрбек, сондай-ақ ҚР Туризм және спорт министрлігі Спорт және дене шынықтыру істері комитетінің төрағасы Руслан Есеналин қатысты.
Халықаралық деңгейдегі мәртебелі меймандар
Чемпионаттың ашылуында әлемдік спорт ұйымдарының өкілдері де бой көрсетті. Атап айтқанда, Халықаралық спорттық ату федерациясының президенті Лучано Росси, Азия ату конфедерациясының басшысы шейх Салман Сабах әл-Салем ас-Сабах және бірқатар халықаралық федерация өкілдері арнайы келді. Бұл – Шымкент төрінде өтіп жатқан турнирдің аса жоғары мәртебесін айқындай түседі.
Қала әкімі: «Бұл чемпионат – үлкен сенімнің белгісі»
Қала әкімі Ғабит Сыздықбеков спортшыларды, жаттықтырушыларды және қонақтарды айтулы додаға қатысуларымен құттықтап, ұйымдастырушыларға алғыс білдірді:
«Бұл чемпионатты Шымкентте өткізу – бізге көрсетілген үлкен сенімнің белгісі. Қала әкімдігі тарапынан жарыстың жоғары деңгейде өтуіне барлық жағдай жасалды. Бүгінгі дода спортшылардың шеберлігін шыңдап қана қоймай, еліміздегі спорттық ату мәдениетінің дамуына тың серпін береді», – деді қала басшысы.
27 елден – 800 спортшы
16-30 тамыз аралығында өтетін чемпионат «Shymkent Shooting Plaza» халықаралық деңгейдегі ату кешенінде ұйымдастырылып отыр. Мұнда 27 елден келген 800-ге жуық спортшы бақ сынайды.
Жарыстар келесі спорт түрлері бойынша өтеді:
- Тапанша
- Мылтық
- Қозғалмалы нысана
- Стендтік ату
- Трап
- Скит
- Скит-микс
Барлығы 700-ден астам медаль сарапқа салынады. Сонымен қатар, чемпионат олимпиадалық бағдарламаның екі бағыты бойынша өткізіледі: нысана көздеу және стенд ату.
Чемпионаттың басты мақсаттары
Ауқымды спорттық іс-шараның негізгі міндеттері – атқыштар спортын кеңінен насихаттау, спортшылардың кәсіби шеберлігін арттыру, халықаралық рейтингтерін анықтау және төрешілер мен жаттықтырушылардың біліктілігін жетілдіру.
Шымкент – спорт алаңы
Айта кетейік, соңғы жылдары Шымкент қаласы халықаралық деңгейдегі спорттық турнирлер мен чемпионаттарды қабылдауда қарқынды дамып келеді. Азия чемпионаты – осы үрдістің айқын дәлелі.
Бұл шара спортшылар үшін ғана емес, қала тұрғындары мен қонақтары үшін де спорт мерекесіне айналмақ.
Шымкент қаласы әкімінің баспасөз қызметі
